Afisa wa Polisi Akataa Uhamisho wa Turkana, Aitisha Serikali Imfukuze Kazi

Afisa wa polisi Hiram Kimathi ameitaka serikali imfukuze kazi, akisema wazi kuwa hataheshimu uhamisho wake tata hadi Tondonyang, Kaunti ya Turkana.

Akizungumza na wafuasi wake kupitia mitandao ya kijamii, Kimathi alisema anaamini uhamisho huo ni adhabu kwa kuzungumzia matatizo yanayoikumba Huduma ya Kitaifa ya Polisi (NPS).

Alisema alitarajia uhamisho huo, lakini aliutaja kuwa wa nia mbaya.

"Nifukuzeni kazi kama mnataka. Sitanyamazishwa kwa kusema ukweli," alisema Kimathi.

"Huu uhamisho haukuwa wa dhati. Ulikuwa wa chuki. Kwa nini mimi, katika taifa zima? Kwa nini mnahamisha Hiram Kimathi peke yake?" aliongeza.

Kimathi alisema hatua hiyo inaashiria tatizo kubwa ndani ya NPS.

"Niliutarajia kwa sababu nilijua wangenipeleka hata iweje. Lakini sikuuchukulia vibaya," alisema.

"Nafikiri ikiwa Huduma ya Polisi inaweza kunipeleka Tondonyang, Turkana, umbali wa kilomita 180 kutoka Lodwar, kwa sababu ya kuzungumza hadharani, inaonyesha wazi kuwa kuna tatizo kubwa."

Afisa huyo alisema alitarajia kuwa sauti ndani ya huduma ya polisi, ili kusaidia kuendeleza ajenda ya ushirikiano kati ya polisi na jamii.

Alisema uhusiano kati ya polisi na raia unahitaji kurekebishwa, na kwamba sauti yake ingeweza kutumika kufanikisha hilo.

Alieleza kuwa tayari amehudumu katika maeneo ya mipakani na kwa sasa anahitaji kupangiwa kazi karibu na mji ili aweze kulea familia yake.

"Sistahili kurudi tena maeneo ya mbele. Kazi yangu kule imekamilika," alisema.

Kimathi pia alieleza kuwa hana hofu ya kupoteza kazi.

"Hakuna mtu alizaliwa na kazi. Nikifutwa kazi, nitarudi kwa jamii na kuanza upya," alisema.

Aliongeza kuwa Tondonyang si eneo la adhabu, lakini katika hali yake, uhamisho huo umetumika kama njia ya kumwadhibu.

"Watu walioko huko hawaadhibiwi. Lakini kwangu mimi ni adhabu kwa sababu nilizungumza," alisema Kimathi.