• Kanisa hilo ambalo halijasajiliwa, ambalo lilianza kuendeshwa mwaka wa 2017, limetajwa kuwa dhehebu la kidini na meya wa Soroti City West Peter Patrick Emaru, chanzo kimoja kiliarifu.
Image: Facebook//DJSoxxy
Mchungaji mmoja katika jimbo la Soroti nchini Uganda ni mgeni wa polisi baada ya kutiwa mbaroni akishukiwa kuwa mwenye mafunzo yenye itikadi kali kwa waumini wa kanisa lake.
Kwa mujibu wa vyombo vya habari nchini humo, mhubiri huyo wa dhehebu la Galilee Ministry of Christ alikamatwa na Polisi kutoka Kitengo cha Soroti City West kwa madai ya kuwasajili na kuwahifadhi zaidi ya waathiriwa 200.
Kanisa hilo ambalo halijasajiliwa, ambalo lilianza kuendeshwa mwaka wa 2017, limetajwa kuwa dhehebu la kidini na meya wa Soroti City West Peter Patrick Emaru, chanzo kimoja kiliarifu.
"Huu ni mfano halisi wa masaibu ya waathiriwa katika madhehebu ya kidini, ambao mara nyingi wanaogopa kuhoji viongozi wao," Emaru alisema.
Habari za kijasusi zilidokeza kuwa Mchungaji huyo aliwahadaa wafuasi wake, akawafungia kanisani na kuwanyima matibabu yanayostahili.
Uchunguzi wa polisi ulianza kufuatia taarifa, na kusababisha kukamatwa kwa Mchungaji huyo na Kamanda wa Polisi wa Kitengo Mohamed Rashid Byansi.
Kabla ya kukamatwa, SP Byansi aliwaonya waumini kuhusu shughuli za kanisa hilo, lakini walimpuuza.
Wakati tukio hilo linakamatwa, waumini 50 walikutwa katika kanisa hilo, huku wagonjwa watano waliokuwa mahututi wakipelekwa katika Hospitali ya Rufaa ya Mkoa wa Soroti kwa matibabu.
Kaimu msemaji wa Polisi Kanda ya Mashariki ya Kyoga, Edison Obukulem, alithibitisha kuwa jalada la uchunguzi wa jumla limefunguliwa dhidi ya Mchungaji huyo.
“Polisi wanatoa msaada wa kisaikolojia kwa wahasiriwa na kuwataka wananchi kuripoti matukio yanayotiliwa shaka kwa mamlaka za mitaa,” alisema.
Mchungaji huyo alidai kuwa kanisa lake lilikuwa likiwasaidia wagonjwa ambao hawajapona katika vituo vya afya na kuwataka waumini kukaa ndani ya kanisa hilo ili kuepuka vishawishi.
Justine Emalu, muumini wa kanisa hilo, alilitetea kanisa hilo akisema limetoa wagonjwa wengi ambao wameshindwa kupokea msaada kutoka hospitalini.
Aliomba mchungaji huyo aachiliwe ili kuokoa roho za watu wasio na hatia, akisema kuwa wagonjwa waliopatikana katika kanisa hilo walikuwa waathiriwa wa mfumo wa afya uliofeli nchini Uganda.