Jamaa anayedaiwa kumpiga mwenzake kwa kuwa na msimamo tofauti wa kisiasa akamatwa

Polisi katika kaunti ya Kisumu wanamzuilia Jamaa ambaye alinaswa kwenye kanda ya video akimpiga mwenzake kwa kuwa na msimamo tofauti wa kisiasa amekamatwa.

Jamaa huyo alikamatwa Jumatatu kufuatia kisa hicho kilichotokea hapo awali  katika mtaa wa Nyalenda.

Mzozo ulichimbuka baada ya mhasiriwa kuweka wazi kwamba anampendelea Dkt Joshua Oron kwa kiti cha ubunge cha Kisumu ya Kati.

Mshukiwa anaripotiwa kuwa mfuasi wa mbunge wa sasa wa eneo hilo Fred Ouda.

Kamanda wa polisi wa eneo la Nyanza, Karanja Muiruri alisema idara yake imeanzisha msako wa kumtafuta mtu aliyekuwa akirekodi video hiyo.

Muiruri aliongeza kuwa mshukiwa yuko rumande akisubiri kufikishwa mahakamani.

Pia alisema watarekodi taarifa ya mhasiriwa kuhusu kile kilichojiri.

Video hiyo iliyosambaa kwenye mtandao ya kijamiii inaonyesha mhasiriwa akichapwa viboko na kulazimishwa kujitolea kumuunga mkono mbunge Ouda.

Katika taarifa ya mapema, mkuu wa Tume Huru ya Uchaguzi na Mipaka (IEBC) Wafula Chebukati aliwataka Wakenya wote kuepuka vitendo vya ghasia tunapoelekea uchaguzi mkuu wa Agosti 9, mwaka huu.

"Wagombea wote, vyama vya siasa, wafuasi wa wagombea, Serikali na kwa hakika Wakenya wote wana wajibu wa kuzingatia Maadili ya Uchaguzi na kuepuka ghasia, vitisho na kulipiza kisasi ambavyo vinaweza kujumuisha uendeshaji wa uchaguzi huru, wa haki na wa amani. ," alisema.

Chebukati alionya kuwa huenda vitendo hivyo vikahatarisha usalama wa nchi.

Tume ya Kitaifa ya Uwiano na Utangamano (NCIC) pia imewaonya wanasiasa dhidi ya kuendeleza vurugu, huku ikisema kwamba huu sio wakati wa vurugu kama nchi,inapoelekea katika uchaguzi mkuu wa Agosti.

Jumatatu tume hiyo ililaani vurugu vilivyotokea Jumapili katika uwanja wa Jacaranda jijini Nairobi ambako naibu rais William Ruto alikuwa ameandaa mkutano.

NCIC ilisema kwamba imeanzisha uchunguzi kuhusiana na vurugu hivyo huku pande mbili za siasa maarufu kiendelea kunyoosheana kidole cha lawama.