Daddy Owen afunguka alivyo'salimiwa' na Wakenya baada ya kutumbuiza katika hafla ya Jamhuri Day

Mwimbaji wa nyimbo za Injili Owen Mwatia almaarufu Daddy Owen alikuwa mwathiriwa wa unyanyasaji wa mtandaoni siku ya Alhamisi baada ya kutumbuiza katika hafla ya kitaifa ya Jamhuri Day katika bustani ya Uhuru, Nairobi.

Katika taarifa aliyochapisha Ijumaa, msanii huyo alifichua kuwa alipokea simu na jumbe nyingi baada ya namba yake kuvunjishwa mtandaoni.

Owen alisema hata alipokea pesa kutoka kwa watu kadhaa na hata kufanya mazungumzo na watu ambao alifanikiwa kushika simu zao.

“Jana NILISALIMIWA na WAKENYA! Sema kusalimiwa!! Gaitho alifichua namba yangu nisalimwe! Nilikuwa nikifikiri simu yangu huwa bize, jana ndipo nilipopata ufafanuzi wa kweli wa simu bize!,” Daddy Owen alisema.

Aliongeza, “Simu yangu ilikuwa ikilia—simu, meseji, jumbe za WhatsApp na tani nyingi za meseji za Mpesa. (Zilikua zinatumwa Bob bob). Niliamua kuloweka yote ndani na kushika simu chache. Lo, matusi mabaya yalikuwa ya hatua ya juu! Lakini wengine walikuwa wanaelewa sana, na tulikuwa na mazungumzo mazuri.

Mwimbaji huyo wa nyimbo za injili aliendelea kufafanua jinsi majibizano yake na Wakenya aliozungumza nao yalivyokuwa.

"Hapa ni mchanganuo wangu baada ya uzoefu. 30% walikuwa unyanyasaji mtupu. Matusi nzito nzito! 20% ya simu zilitoka kwa watu wenye mantiki ambao walitaka kuelewa ni kwa nini niliimba, na baada ya kuzungumza nao, walifahamu hali hiyo. 20% walifurahi sana kuwa na nambari yangu, mashabiki safi. 20%: Maombi ya chakula cha mchana au watu walio na matatizo ya kweli, ilibidi nibandike kadhaa na yalipendeza. 5%: Walijaribu kunishawishi kwamba nilifanya jambo sahihi. 5% walikuwa Flash Gordons. Mwishowe, wale waliohitaji mawasiliano ya kweli walipata. Wengine? SALAMU nilipata na nikapokea!,” alisema.

Daddy Owen ni miongoni mwa wasanii waliovuma waliotumbuiza kwenye tamasha la Jamhuri Day siku ya Alhamisi.

Wasanii wengi waliopanda jukwaani walipata wakati mgumu baadaye kutoka kwa kundi la wanamtandao ambao waliwafikia baada ya namba zao kuwekwa kwenye mitandao ya kijamii.