MKONO WA SHERIA :Ibrahim Akasha  Ahukumia miaka 23 Jela nchini Marekani

Mwisho umetimia kwa familia ya ulanguzi wa dawa za kulevya ya Akasha baada ya mahakama nchini Marekani kumhukumu Ibrahim Akasha kifungu cha miaka 23 jela . Jaji wa Marekani  Victor Marrero  alimpa hukumu hiyo Ibrahim katika  korti ya  Manhattan  baada ya kuahirisha kikao cha kumhukumu mara mbili mwaka jana .

Mwanzoni ,hukumu hiyo ilifaa kutolewa  Novemba mwaka jana  kabla ya kusongeshwa  hadi disemba tarehe sita ,kisha tena ikasongeshwa hadi  januari tarehe 10 mwaka huu .Ibrahim amekuwa katika seli moja huko New York  kwa miaka mitatu akingoja hukumu dhidi yake  baada ya kuhamishwa hadi Amerika kutoka Mombasa januari mwaka wa 2017 .

Mnamo Oktoba mwaka wa 2018  Ibrahim na kakake mkubwa  Baktash  walikiri mashtaka dhidi yao katika mahakama ya Manhattan kwa kupanga njama ya kusafirisha dawa za kulevya za heroin  na  methamphetamine,  kubeba bunduki za rashasha  na vifaa vya kusababisha uharobifu  , makosa ya ulanguzi wa dawa za kulevya,kuwapa hongo maafisa wa Kenya ili kukwepa kuwajibikia uhalifu wao na kuzuia haki  kwa lengo la kuepuka kusafirishwa hadi marekani kujibu mashtaka dhidi yao. Jaji huyo mmoja ndiye aliyemhukumu Baktash kifungu cha miaka 25 jela agosti mwaka jana .