Nilikuwa nacheza densi za roadshow kwa zawadi kama kofia - David Moya

Mcheza densi maarufu wa TikTok nchini Kenya David Moya amezungumza jinsi safari yake ya kucheza densi za kuburudisha ilianza.

Akizungumza na Mwende na Clemmo Februari 22 kwenye radio, Moya alisema kwamba alikulia Maisha yake Maai Mahiu na alikuwa anaenda kwenye maonyesho ya kando ya barabara maarufu roadshows ili kucheza kwa zawadi ndogo ndogo kama kofia na shati tao zilizopeanwa kwa watazamaji pale.

“Nilikuwa naenda kucheza densi kwa roadshows ambapo walikuwa wanapeana zawadi za kofia kwa watu na nilikuwa wa kwanza kufika huko,” alisema Moya.

Mcheza densi huyo aliingia kwenye mtandao wa TikTok mwaka 2019 ambapo alianza kusambaza video fupi akicheza densi ambapo kufikia sasa amechyukuliwa na wasanii mbalimbali katika video za miziki yao.

“Nimepewa kazi nyingi za kucheza densi katika tasnia ya humu nchini ambapo nimeonekana kwenye video za wasanii kama vile Nameless, Khaligraph Jones na wengine wengi. Pia nime perform kwenye majukwaa ya kitaifa na kimataifa,” alisema Moya.

Moya amekuwa akivizia mtu kwenye mitaa ya Nairobi na kuanza kucheza densi mbele yake bila huyo mtu kutarajia na alipoulizwa kama sarakasi zake hizo za kuvizia zimewahi mpeleka pabaya, alisimulia kisa ambacho kilizua zogo na Maasai mpaka ikabidi wamtulize kwa kununu moja kati ya bidhaa zake.

“Ilikuwa mwanzo mwanzo huko wakati tulikuwa tunafanya skits za karate na tulienda Amboseli ambapo tulijaribu skits hizo kwa wafanyibiashara wamaasai tukajipata pabaya. Lengo letu lilikuwa ni kuburudisha tu lakini wale jamaa hawakuelewa mzaha huo. Nilichukua baadhi ya bidhaa za mfanyibiashara mmoja Maasai na nikarusha chini, wenzake walishirikiana na kutuapiza, mpaka ikabidi tununue rungu yao,” alieleza Moya.

Mcheshi huyo wa TikTok alieleza kwamba video zake zote hakuna yeye hupangiwa na hivo hawajui matokeo yake yatakuwaje ila ni kujaribu tun a baadae inatokea vizuri na watu wanaipenda.