(Video) Polisi watambua jamaa aliyeuawa kwa kupigwa risasi Kasarani

Polisi wamemtambua mwanamume aliyepigwa risasi na kuuawa kwenye gari eneo la Mirema, Kasarani kama Samuel Mugo Mugota mwenye umri wa miaka 49 na kwamba alikuwa na historia ya uhalifu.

Polisi walisema alikuwa na vitambulisho saba kwenye gari lake alipopigwa risasi na kuuawa Jumatatu mchana na mtu asiyejulikana.

Mwanamke mmoja ameambia polisi kuwa kitambulisho chake na hati za benki zilizotumiwa kuiba shilingi 360,000 kwenye akaunti yake ya benki zilipatikana ndani ya gari la jamaa huyo.

Polisi walisema alikuwa akifuatiliwa na wapelelezi kwa sababu za kubadilisha nambari za simu kila wakati na sakata ya ulaghai wa pesa 'wash wash'.

Alipigwa risasi kwa karibu baada ya kusimamishwa na watu wasiojulikana akiendesha gari aina ya Honda CRV.

Jamaa aliyempiga risasi alitoroka katika gari lililokuwa limeegeshwa mbele ya gari la marehemu.

Wakati huo huo, Polisi wanachunguza tukio ambapo mwanamume mmoja alidungwa kisu na kujeruhiwa vibaya na wanaume wawili wanaoaminika kuwa wanachama wa kundi la wapenzi wa jinsia moja (LGBTQ) wakiwa katika chumba cha kulala wageni katikati mwa jiji.  

Polisi wanasema wanaume wawili walikodi chumba kwanza kwenye nyumba hiyo kabla ya kuungana na wa tatu. Akiwa humo, yalizuka mapigano baina yao kabla ya wawili kumgeukia mmoja na kumdunga kisu tumboni na kutoroka. 

Mmoja wao hata hivyo alikamatwa baadaye walipokuwa wakijaribu kutoroka na kuwaambia polisi kwamba walikosana wakiwa chumbani na kusababisha makabiliano hayo.  Aliwaambia polisi kuwa ni wanachama wa kundi la wapenzi wa jinsia moja.

Polisi walisema majeruhi alipelekwa hospitalini ambako yuko chini ya uangalizi huku mshukiwa akitarajiwa mahakamani kujibu mashtaka mbalimbali.