Hutanilazimisha Kukuunga Mkono Kisiasa, Waiguru Amwambia Gachagua

Gavana wa Kirinyaga, Anne Waiguru, amemwambia Naibu Rais wa zamani Rigathi Gachagua kuwa hatalazimishwa kujiunga na kambi yake ya kisiasa kupitia vitisho au mashambulizi binafsi.

Akizungumza wakati wa usambazaji wa vifaa vya kukabiliana na mabadiliko ya tabianchi katika uwanja wa Kamiigua, Kutus, Waiguru alisema viongozi waliochaguliwa wa Mlima Kenya hawatatishwa kuunga mkono mtu yeyote.

“Hatutamuabudu mtu yeyote, hatutamfanya kuwa mungu wetu lakini tunapanga mustakabali wetu wa kisiasa. Tutawaonyesha watu wetu njia ifaayo ifikapo 2027,” alisema.

Aliendelea kumtaka Gachagua aache kuingilia masuala asiyokuwa na ukweli nayo, akisema hatapokea maagizo kutoka kwa watu wa nje kuhusu jinsi ya kuwahudumia wananchi.

“Tunajua jinsi ya kuwahudumia watu wetu, na tuna mpango thabiti wa utoaji huduma, hatuhitaji maagizo kutoka kwa mtu yeyote ili tufanye kazi yetu,” Waiguru alisema.

Waiguru alimtaka Gachagua amheshimu yeye pamoja na wapiga kura wa Kirinyaga waliompa muhula wa pili kuhudumu kama Gavana.

“Tuheshimiane, hatutajihusisha na matusi dhidi ya yeyote, lakini acha kusambaza uongo. Watu wa Kirinyaga hawakukosea kunichagua kwa muhula wa pili,” aliongeza.

Alisema suala la ununuzi wa maziwa na Shirika la New Kenya Cooperative Creameries (KCC) katika ushirika wa Kirima Slopes Dairy lilitatuliwa na serikali ya kaunti kabla ya Gachagua kutembelea eneo hilo.

“Niliitisha mkutano kati ya New KCC na uongozi wa ushirika huo, na tatizo hilo lilitatuliwa mapema na KCC ilianza kununua maziwa kwa Sh65 kwa lita siku hiyohiyo, hivyo pata ukweli kabla hujazungumza,” Waiguru alisema.

Gavana huyo alisema “anajua vyema jinsi ya kusoma hali ya kisiasa mashinani” na atawaelekeza wafuasi wake kuhusu wapi pa kupiga kura wakati wa uchaguzi utakapowadia.

Waiguru alisema yeye si kiongozi wa kuburuzwa kisiasa, akisisitiza kuwa hakuna mtu anayeweza kuchaguliwa kuwa Gavana bila uungwaji mkono wa wananchi.

“Mimi ndiye niliyeanzisha usemi wa ‘Kusikiza ground’, kwa hivyo kama kuna mtu anayejua kusoma hali ya siasa mashinani, ni mimi. Wameazima kauli yao kutoka kwangu,” alisema Gavana huyo.

Waiguru alilaani tukio la hivi karibuni la kupigwa risasi kwa muuzaji barabarani, akilitaja kuwa kitendo kisicho cha lazima na ukiukaji wa wazi wa sheria.