Jonah Kariuki, baba wa mchuuzi mwenye umri wa miaka 22, Boniface Kariuki — aliyepigwa risasi kichwani na polisi wakati wa maandamano ya kupinga serikali jijini Nairobi — amekuwa mhanga wa matapeli waliodai kuwa maafisa wa Mamlaka ya Afya ya Jamii (SHA).
Matapeli hao walimkaribia Kariuki wakijifanya kuwa wanataka kumsaidia kulipa bili ya hospitali ya mwanawe inayoongezeka kwa kasi na kumwandikisha yeye pamoja na familia yake katika mpango wa SHA. Katika mchakato huo, walimlaghai kiasi cha Shilingi 200,000.
“Alikuwa mtu aliyeniambia kuwa anatoka SHA. Aliniomba nitume Shilingi 20,500 ili anisaidie kupunguza gharama ya hospitali, lakini yule mtu niliyemtuma kuweka pesa alikosea na kutuma Shilingi 200,500,” alieleza wakati wa mkutano na wanahabari katika Hospitali ya Kitaifa ya Kenyatta (KNH), ambako Boniface amelazwa.
Kariuki alifichua kuwa bili ya hospitali tayari imefikia takriban Shilingi milioni 1 na inaendelea kuongezeka kila siku.
“Hatuna hesabu kamili ya bili, lakini makadirio ya awali yaliwekwa kuwa ni takriban milioni moja na inaendelea kupanda,” alisema.
Kutokana na hali hiyo, wanaharakati wa mitandaoni na wafuasi wa familia hiyo wameanzisha kampeni ya kuchangisha fedha kwa lengo la kusaidia familia kumudu gharama zinazoongezeka za matibabu. Kariuki alieleza kuwa bado hajafanikiwa kuwasilisha rasmi ombi la kurejeshewa pesa alizotapeliwa kwa mtoa huduma.
“Nilienda Safaricom lakini sikuweza kuingia kwa sababu nilihitajika hapa [KNH], lakini nimechukua OB [kumbukumbu ya tukio], kwa hivyo nitarudi ili wanipe taarifa kamili,” aliongeza.
Wakili wa familia alithibitisha kuwa gharama za matibabu kwa sasa zimesimama kwenye takriban Shilingi milioni moja, huku akisema bado hakuna taarifa za kina kuhusu hali ya kiafya ya Boniface.
“Hatujapewa taarifa yoyote,” alisema wakili huyo. “Lakini tumemtembelea na unaweza kuona kwamba hajibu, yupo tu. Hali aliyokuwa nayo ndiyo bado anayo hadi sasa.”
Inaripotiwa kuwa Boniface alikuwa akiuza barakoa karibu na jengo la Imenti House katika Barabara ya Moi mnamo Jumanne, Juni 17, wakati aliporushwa risasi kwa karibu na afisa wa polisi wakati wa maandamano ya kitaifa.
Maandamano hayo yalizuka kufuatia kifo cha mwanablogu Albert Ojwang mikononi mwa polisi akiwa rumande, jambo lililosababisha hasira kubwa nchini na wito wa haki.
Baada ya tukio hilo, Boniface alipelekwa kwanza kwenye kliniki moja jijini kwa huduma ya dharura, kisha baadaye akahamishiwa Hospitali ya Kitaifa ya Kenyatta ambako alifanyiwa upasuaji.
Kwa sasa yupo katika chumba cha uangalizi maalum (ICU). Kuhusiana na tukio hilo la kupigwa risasi, maafisa wawili wa polisi — Klinzy Barasa na Duncan Kiprono — walikamatwa na kufikishwa mahakamani.
Wanasalia kizuizini hadi Julai 3 huku uchunguzi ukiendelea. Tukio hilo limezua ghadhabu kitaifa, waandamanaji wakitaka haki sio tu kwa Boniface bali pia kwa Albert Ojwang.
Mashirika ya haki za binadamu na taasisi za kisheria yametoa wito wa uchunguzi wa wazi na kuwawajibisha waliohusika.
© Radio Jambo 2024. All rights reserved