Mbunge wa Mumias Mashariki, Peter Salasya, amemtaka Rais William Ruto ajiuzulu na kuachia vijana uongozi wa urais.
Kupitia ujumbe alioweka kwenye mtandao wa X, Jumamosi, Juni 21, 2025, Salasya alisema kuwa Ruto hana maarifa ya kubadilisha Kenya.
“Nataka kuwaambia Wakenya kuwa Ruto hajui lolote linaloweza kubadilisha nchi hii. Mkimuamini ni kwa hasara yenu. Hana busara kama anavyofikiri. Sasa anapaswa kustaafu siasa na kumuachia kiongozi kijana Peter Salasya urais ili apange jinsi ya kuleta ajira kwa vijana,” alisema.
Kwa mujibu wa Salasya, kupanda kwa Ruto kisiasa kulitegemea pakubwa kuunda miungano ya kimkakati na kikundi cha Raila Odinga ili kupata ushawishi Bonde la Ufa, na baadaye na Uhuru Kenyatta ili kupata nafasi ya Naibu Rais na kuwavutia wapiga kura wa Mlima Kenya.
“Alimhitaji Raila na Pentagon yake ili athibitishe uongozi wake Bonde la Ufa kama kigogo wao; akaenda kwa Uhuru Kenyatta ili apate nafasi ya Naibu Rais na apate mapenzi ya watu wa Mlima Kenya. Hii ina maana hawezi kufanikisha chochote peke yake kama anavyodhani,” alisema.
Zaidi ya hayo, Salasya alisema kuwa baada ya kugundua kuwa kuongoza taifa ni mzigo mzito, Rais Ruto alimgeukia aliyekuwa Waziri Mkuu Raila Odinga kwa msaada wa kisiasa ili kutuliza uongozi wake.
“Baada ya kugundua kwamba nchi hii ni ngumu kuiongoza, alikwenda kumtafuta Raila Odinga angalau apate usingizi Ikulu. Alienda peke yake bila kampeni; alipoteza, hata alishindwa katika usimamizi wa nchi hii; hadi akafuta karibu baraza lake lote la mawaziri,” alisema.
“William Ruto anapaswa kujua kuwa si gwiji wa siasa kama anavyodhani, na akumbushwe kuwa alimhitaji Moi ili kupata nguvu za kisiasa na kushinda ubunge wa Eldoret Kaskazini ndipo apate nafasi ya kujitokeza kisiasa,” aliongeza.
Matamshi yake yanajiri baada ya Rais William Ruto kumkashifu aliyekuwa naibu wake, Rigathi Gachagua, akipuuza tishio lolote la kisiasa kutoka kwake na kudai kuwa hamhofii wala hotuba zake za kisiasa.
Ruto alimwita Gachagua “mtu wa makelele” asiye na dira wala ajenda kwa Kenya, akisema hawezi kumnyima usingizi kwa sababu hajalenga maendeleo bali lawama zisizo na msingi.
Akizungumza katika Mkutano wa 10 wa Mwaka wa Ushirika wa Meru Central, Jumamosi, Juni 21, 2025, Rais Ruto alimshambulia vikali Gachagua na kusema kuwa mashambulizi ya mara kwa mara ya aliyekuwa naibu wake dhidi ya serikali hayana msingi wowote na hayana mchango wowote wa maendeleo.
Aidha, aliwapuuza wapinzani wake, akisisitiza kuwa hawawezi kufanikiwa kwa vitisho kwani kazi yake inalenga utoaji wa huduma, si siasa tupu.
“Nimekuwa kwenye siasa kwa miaka mingi. Hakuna mtu anayeweza kunitisha kwa makelele. Hawa ni watu wa kelele tu, kila saa ‘Kasongo’, ilhali walishindwa walipokuwa madarakani, na wataendelea kushindwa kwa sababu hawana la kutoa,” alisema Ruto.
© Radio Jambo 2024. All rights reserved