Kamishna Fahima Araphat Abdallah Achaguliwa Makamu Mwenyekiti wa IEBC

Fahima Araphat Abdallah amechaguliwa kuwa Makamu Mwenyekiti wa Tume Huru ya Uchaguzi na Mipaka (IEBC).

Anakuwa wa kwanza kushikilia wadhifa huo chini ya uongozi mpya wa tume hiyo.

Uchaguzi wake ulifanyika katika kikao cha 288 cha tume hiyo kilichofanyika saa chache tu baada ya hafla ya kula kiapo mnamo Ijumaa, Julai 11, 2025.

"Tukizingatia kuchapishwa kwa notisi rasmi na kuapishwa kwa Mwenyekiti na makamishna wa Tume, tunafuraha kuwajulisha umma na wadau kuwa Kamishna Fahima Araphat Abdallah amechaguliwa kuwa Makamu Mwenyekiti katika kikao cha 288 cha Tume kilichofanyika leo katika ukumbi wa bodi ya Tume," ilisomeka taarifa ya IEBC.

Akizungumza muda mfupi baada ya kula kiapo katika Mahakama ya Juu pamoja na makamishna wapya sita, Mwenyekiti Ethekon alisisitiza umuhimu wa chaguzi huru na za haki katika kuimarisha demokrasia. Alisema uteuzi wake unakuja wakati muhimu kwa taifa.

"Uchaguzi huru na wa haki ndio msingi wa jamii ya kidemokrasia. IEBC imekabidhiwa jukumu kubwa kuhakikisha kuwa sauti ya kila mwananchi inasikika na kuheshimiwa," alisema.

Aliwakumbusha Wakenya kuhusu mamlaka yao ya kikatiba, akiwahimiza kushikamana ili kujenga taifa lenye amani na demokrasia thabiti. "Uaminifu wangu wa kwanza ni kwa Wananchi wa Kenya ambao wanashikilia mamlaka ya juu kabisa chini ya Ibara ya 1 ya Katiba. Nawahimiza Wakenya wote kutumia fursa hii kujenga demokrasia yenye amani, utulivu na usalama," aliongeza.

IEBC na Wakenya Ndio Wataamua Rais Atakayechaguliwa Mwaka 2027

Akizungumzia changamoto zinazolikabili shirika hilo la uchaguzi, Ethekon alieleza hatari ya habari za uongo na upotoshaji, akionya kuwa vinaweza kuhatarisha uthabiti wa taifa.

"Tuna fursa ya kushirikiana na vyombo vya habari kuhakikisha kuwa tunatoa elimu, taarifa na kuzingatia ukweli wa mambo," alibainisha. "Ninatoa wito kwa Wakenya wote na wadau kushirikiana tunapojiandaa kwa chaguzi ndogo na Uchaguzi Mkuu. Uchaguzi wa kuaminika si jukumu la IEBC pekee bali ni jukumu la pamoja la kitaifa."

Makamishna wapya waliokamilisha tume hiyo ni Ann Njeri Nderitu, Moses Alutalala Mukhwana, Mary Karen Sorobit, Hassan Noor Hassan, Francis Odhiambo Aduol, na Fahima Araphat Abdallah, ambao wanajiunga na Ethekon kukamilisha uongozi wa IEBC.

Tume hii mpya ya IEBC inaanza kazi katika kipindi muhimu wakati taifa linaelekea kwenye chaguzi ndogo mbalimbali na maandalizi ya Uchaguzi Mkuu wa mwaka 2027.