Ruto: Uchumi wa Kenya Umo Miongoni mwa Sita Bora Barani Afrika

Rais William Ruto amesema kuwa serikali yake imefanikiwa kuimarisha uchumi wa Kenya.

Ruto alisema amefanikiwa kuiinua nchi kutoka ukingoni mwa mgogoro wa madeni hadi kuwa miongoni mwa mataifa sita yenye uchumi mkubwa zaidi barani Afrika.

Akizungumza Jumamosi, Julai 12, 2025, Ruto alikumbuka changamoto za kiuchumi ambazo serikali yake ilirithi miaka miwili iliyopita, akieleza kuwa wachambuzi wa kifedha wa kimataifa walikuwa wametabiri hali mbaya kwa Kenya.

“Wakati huo, kazi yangu ilikuwa kuunganisha nchi na kutengemaza uchumi wa taifa letu. Wengi walikuwa wameiorodhesha Kenya miongoni mwa nchi sita za Afrika zilizokuwa zikielekea kuporomoka kiuchumi kutokana na madeni.”

Kwa mujibu wa Ruto, mataifa matano kati ya sita yaliyotajwa kuwa hatarini na mashirika ya kimataifa hatimaye yaliingia kwenye mgogoro. Hata hivyo, Kenya iliweza kuepuka hali kama hiyo, kutokana na kile alichokiita mpangilio wa kiuchumi wenye nidhamu na mkakati uliotekelezwa na serikali yake.

“Mataifa matano yalianguka, lakini Kenya iliokolewa kwa sababu tuliweka mambo yetu vizuri.”

Aidha, alifichua kuwa Shirika la Fedha la Kimataifa (IMF) hivi karibuni lilitambua maendeleo ya kiuchumi ya Kenya, na kusema kuwa nchi hiyo imepanda kutoka nafasi ya nane hadi nafasi ya sita kwa ukubwa wa uchumi barani Afrika.

“Ninaweza sasa kusema kwa kujiamini kuwa uchumi wa Kenya ni imara. Sarafu yetu ni imara, mapato yetu ya fedha za kigeni ni imara, na ndiyo maana Kenya sasa ni nchi ya sita kwa uchumi mkubwa Afrika,” alisema Ruto.

Alibainisha kuwa maendeleo haya ni sehemu ya ahadi yake ya awali ya kuimarisha mifumo ya kifedha ya taifa katikati ya mzigo mkubwa wa madeni na hali ya sintofahamu ya kiuchumi. Moja ya viashiria muhimu vya kuimarika kwa uchumi, alieleza, ni kuimarika kwa thamani ya shilingi ya Kenya.

“Sarafu yetu imeshuka kutoka 165 hadi 129 dhidi ya dola ya Marekani,” alisema, akitaja hilo kuwa ushahidi kuwa misingi ya uchumi wa Kenya imeimarika.

Kauli za Ruto zinajiri wakati ambapo serikali yake iko chini ya uchunguzi mkali, hasa kutoka kwa vijana wa Kenya wanaoandamana kupinga kupanda kwa gharama ya maisha na masuala ya utawala.

Ingawa wakosoaji wameeleza wasiwasi kuhusu ukosefu wa ajira na kiwango cha juu cha ushuru, Ruto ameendelea kusisitiza kuwa urejeshaji wa uchumi wa muda mrefu tayari unaendelea na hivi karibuni utaanza kuleta manufaa ya moja kwa moja kwa wananchi wa kawaida.