Spika wa Bunge la Kitaifa Moses Wetang’ula amewahimiza Wakenya kumchagua tena Rais William Ruto katika uchaguzi wa mwaka 2027, akisema kuwa rekodi yake ya maendeleo inamstahili muhula wa pili.
Wetang’ula alisema kuwa serikali ya Kenya Kwanza chini ya uongozi wa Ruto imepiga hatua kubwa tangu ilipochukua hatamu za uongozi miaka miwili iliyopita.
Akizungumza wakati wa ibada ya kanisani eneo la Igembe Kaskazini, Kaunti ya Meru, Wetang’ula aliwahakikishia wakazi kuwa serikali imejitolea kutekeleza ahadi za kampeni, ikiwemo kutafuta suluhisho la changamoto ya ukosefu wa ajira ambayo imekuwa chanzo cha malalamiko kutoka kwa wananchi.
“Kwa hivyo, niliwahimiza watu wa Meru kumuunga mkono Rais Ruto bila kuyumba kwani anastahili muhula wa pili kwa msingi wa rekodi yake ya maendeleo,” alisema Spika Wetang’ula.
Alieleza kuwa Rais Ruto ameimarisha shughuli katika sekta ya elimu pamoja na mafanikio mengine mengi.
Wetang’ula alisema kuwa serikali ya Ruto imewaajiri walimu 76,000, huku bajeti mpya ikitenga fedha za kuajiri walimu wengine 24,000, na hivyo kufanya jumla ya walimu walioajiriwa kufikia 100,000 — idadi kubwa zaidi tangu uhuru.
Viongozi wanaomuunga mkono Rais wamekuwa wakitoa kauli za kuonyesha kuwa watamuunga mkono kuwania muhula wa pili mwaka 2027.
Hii inajiri huku viongozi wa upinzani wakisisitiza kuwa Rais Ruto hastahili kuhudumu zaidi ya muhula mmoja.
Alhamisi, Waziri wa Afya Aden Duale alisema kuwa Ruto ana uhakika wa muhula wa pili. Duale alieleza kuwa muungano wa utawala una idadi ya kutosha ya kumpatia ushindi mkubwa mwaka 2027.
Akizungumza katika mahojiano na Citizen TV siku ya Jumatano, Duale alieleza kuwa hana shaka yoyote kuhusu kuchaguliwa tena kwa Rais.
Alisisitiza kuwa serikali ya Kenya Kwanza itashinda kutokana na rekodi yake ya maendeleo.
“William Ruto atarudi kwa ushindi mkubwa… inshallah, muhula wake wa pili umehakikishwa,” alisema Duale.
“Atapigiwa kura, si kwa sababu ya kitu kingine, bali kwa sababu atatimiza ahadi zake.”
© Radio Jambo 2024. All rights reserved