Mudavadi: Maamuzi Magumu Anayoyafanya Ruto Yatamfaidi Kushinda Uchaguzi wa 2027

Waziri Mkuu anayesimamia pia Masuala ya Kigeni na Diaspora, Musalia Mudavadi, ameonyesha imani kuwa Rais William Ruto atachaguliwa tena katika uchaguzi mkuu wa mwaka 2027.

Akizungumza katika kituo kimoja cha runinga usiku wa Jumapili, Julai 14, 2025, Mudavadi alisema kuwa Rais Ruto ameonyesha kujitolea kuchukua hatua za ujasiri na muhimu kwa ajili ya uthabiti wa muda mrefu na maendeleo ya nchi.

Katika mahojiano hayo ya moja kwa moja, Mudavadi alieleza kuwa ingawa baadhi ya sera zinazotekelezwa na utawala wa sasa zinaweza kuonekana kuwa hazipendwi kwa sasa, ni muhimu katika kuweka msingi wa mafanikio ya baadaye.

“Ukiniuliza kama mtu binafsi, msimamo wangu ni kwamba Rais Ruto atachaguliwa tena kwa sababu anafanya maamuzi magumu sasa, na kufikia wakati wa uchaguzi, matunda na manufaa ya maamuzi haya magumu yataanza kuonekana,” alisema.

Pia aliwapuuza wakosoaji wanaodai kuwa Ruto atahudumu kwa muhula mmoja tu, akisisitiza kuwa uamuzi kama huo utafanywa na wananchi kupitia kura katika uchaguzi ujao.

“Wakati pekee ambapo uamuzi huu (wa muhula mmoja) unafanywa ni tunapofika kwenye debe,” aliongeza.

Kauli hii inakuja siku chache baada ya Rais Ruto kuapa kukabiliana vikali na wale wanaopanga kumng’oa madarakani kinyume cha katiba.

Akizungumza katika Kituo cha Polisi cha Kilimani baada ya kukagua mradi wa makazi ya maafisa wa polisi mnamo Julai 9, 2025, Rais Ruto alisema hataruhusu yeyote kutumia vurugu kumuondoa kutoka nafasi ya juu ya uongozi wa nchi.

Aliwapa changamoto wanaopanga njama hiyo kuijaribu kabla ya Uchaguzi Mkuu wa 2027, akisisitiza kuwa hawezi kuendelea kunyamaza na kwamba “imetosha sasa.”

“Nataka niwaambie hao watu wanaotupatia mihadhara kwamba wanaweza kubadilisha serikali hii kwa kutumia vurugu na njia zisizo halali kabla ya 2027; waijaribu basi,” alifoka.

“Hii ni nchi ya kidemokrasia, na Wakenya watachagua viongozi wao kupitia kura. Hatuwezi kuchagua uongozi kwa njia ya vurugu. Hilo halitatokea katika nchi hii.”

Rais aliwashambulia pia wakosoaji wake, akihoji kwa nini utawala wake unakumbwa na upinzani wa vurugu ilhali marais waliomtangulia hawakupata hali kama hiyo.

“Wananieleza kuhusu Moi… alikuwa rais, vile vile Kibaki alikuwa rais, na pia Uhuru. Haya yote yanatoka wapi? Huo ni upuuzi! Kwa nini hawakufanya fujo wakati wa Kibaki au wa Uhuru? Mbona mnaleta fujo wakati wangu? Hilo lazima likome,” alitangaza.