Gachagua Aomboleza Kifo cha Mchekeshaji Aliyemuiga, KK Mwenyewe

Naibu Rais wa zamani Rigathi Gachagua ameomboleza kifo cha mchekeshaji wa TikTok na mtayarishaji wa maudhui Zachariah Kariuki, maarufu kama KK Mwenyewe, akimtaja kuwa mchekeshaji mwenye kipawa kikubwa na msukumo kwa vijana wengi wa Kenya.

Katika taarifa iliyotolewa Jumanne, Julai 15, 2025, Gachagua alieleza huzuni yake kubwa kufuatia kifo cha Kariuki.

“Asubuhi hii nimeamka na habari za kuhuzunisha kuhusu kifo cha Bw. Zachariah Kariuki, almaarufu Bw. KK Mwenyewe, mtayarishaji wa maudhui aliyebobea na msukumo kwa wengi.”

“Bw. KK, kijana mchanga, thabiti na mvumilivu, alitumia ucheshi kufikisha ujumbe rahisi na wa ubunifu kwa Wakenya wote na kuzungumza na mioyo yetu,” aliongeza.

Gachagua alieleza pole zake kwa familia, marafiki na jamii ya ubunifu nchini Kenya.

“Natoa rambirambi zangu hasa kwa tasnia ya ubunifu kwa kumpoteza bingwa ambaye jicho lake la ubunifu litaendelea kuishi nasi kwa siku zijazo. Roho yake ipumzike kwa amani ya milele, na Mungu aipatie familia yake amani.”

KK Mwenyewe alifariki usiku wa Jumatatu, Julai 14, wakati akipokea matibabu katika Hospitali ya Kiambu Level 5. Alikuwa na umri wa miaka 23.

Kifo chake kilithibitishwa na mchekeshaji mwenzake Kafengo, ambaye walishirikiana naye katika miradi kadhaa.

"Tumesikitika kutangaza kifo cha ghafla cha Zakaria Kariuki, a.k.a. KK Mwenyewe. Amefariki jana jioni akiwa anapokea matibabu katika Hospitali ya Kiambu Level 5," Kafengo aliandika kwenye Facebook.

"Katika wakati huu wa huzuni, tunaomba msaada na maombi kwa familia na marafiki. Mungu na atupe nguvu katika kipindi hiki kigumu. Roho yake ipumzike kwa amani," aliongeza.

KK Mwenyewe alipata umaarufu mwaka wa 2022 kupitia video zilizosambaa mitandaoni akimuiga Gachagua, mara nyingi akiwa amevalia suti kubwa na kutumia mitindo ya uchekeshaji iliyofanana na ya Naibu Rais wa zamani.

Maudhui yake yaliyoeleweka kwa urahisi yalimwezesha kupata zaidi ya wafuasi milioni 1.5 katika TikTok na Facebook kwa pamoja.

Aliendelea kuwa hai kwenye mitandao ya kijamii hadi mapema mwezi huu, na skit yake ya mwisho iliwekwa mtandaoni Julai 4.

Salamu za rambirambi kutoka kwa wanasiasa na wanatasnia ya ubunifu kote nchini Kenya ziliendelea kumiminika Jumanne, zikimtambua msanii kijana jasiri aliyeutumia ucheshi kuakisi changamoto halisi za maisha na kuwaunganisha watu.