Ruto Aonya Viongozi Dhidi ya Kuchochea Ghasia

Rais William Ruto ametuma onyo kali kwa viongozi wa kisiasa kote nchini, akiwataka waache matamshi ya uchochezi na migawanyiko, na badala yake wazingatie kutafuta suluhisho litakaloinua maisha ya vijana wa taifa.

Kauli ya Rais inatolewa wakati ambapo maandamano ya kitaifa yanaendelea na hali ya kutoridhika miongoni mwa wananchi inazidi kuongezeka kutokana na gharama ya juu ya maisha.

Akizungumza Alhamisi, Julai 17, 2025, wakati wa uzinduzi wa Barabara ya Bridge Savannah–Stage 17–Masimba iliyokarabatiwa, inayopita katika maeneo ya Embakasi Central na Embakasi East, Ruto alitofautisha wazi kati ya uongozi wa kujenga na kile alichokitaja kama ghasia zisizo na tija.

“Hatuna muda wa kushughulikia vurugu, ghasia au migawanyiko ya kikabila; tumejikita katika kujenga nchi yetu,” Rais alitangaza, katika kile kilichoonekana kama dongo kwa wapinzani wa kisiasa wanaochochea machafuko.

Wakati taifa linakabiliana na hali ya uchumi isiyoeleweka na ukosefu wa ajira kwa vijana unaoendelea kuongezeka, Ruto alitaka mwelekeo wa mazungumzo ya kisiasa ubadilishwe na kuelekezwa kwenye suluhisho la vitendo.

“Mtu yeyote anayesema ana mpango kwa Kenya, azungumze na vijana awaeleze namna anavyopanga kuwatengenezea ajira,” alisema.

Ruto alisisitiza kuwa serikali yake inaelekeza nchi katika mwelekeo sahihi, kwa kulenga mageuzi ya muda mrefu badala ya kupendeleza siasa za muda mfupi.

“Nina mpango. Waje na wao pia na yao!” alisisitiza.

Kauli za Ruto zililenga si tu viongozi wa upinzani, bali pia wale wanaopinga kutoka ndani ya muungano wake wa kisiasa. Serikali yake imekuwa chini ya shinikizo kubwa kutimiza ahadi za kampeni na kushughulikia matarajio makubwa ya mamilioni ya vijana Wakenya.

“Jumatano, Julai 16, 2025, niliwaomba viongozi wote wajiepushe na tamaa ya kuchochea vijana na badala yake washirikiane kutafuta suluhisho la kudumu kwa tatizo la ajira,” alisema.

Matamshi yake yanakuja baada ya wimbi la maandamano yanayoongozwa na vijana dhidi ya serikali, ambayo serikali imedai kuwa yanadhaminiwa na baadhi ya viongozi wenye nia ya kuidhoofisha.

Rais alisema serikali inachukua hatua madhubuti za kuunda nafasi za ajira ndani ya nchi na pia nje ya mipaka ya taifa.

Hadi kufikia sasa, Ruto alisema, mpango wa uhamaji wa kazi umewezesha vijana 400,000 wa Kenya kupata ajira nje ya nchi katika kipindi cha miaka miwili iliyopita, huku wengine 320,000 wakiwa wameajiriwa kupitia Mpango wa Makazi Nafuu.