NAIROBI, KENYA, Julai 24, 2025 — Chama cha Orange Democratic Movement (ODM) kimejitokeza kumtetea Katibu Mkuu wake Edwin Sifuna kufuatia malumbano yanayoendelea ndani ya chama kuhusu ushirikiano wake na serikali ya Kenya Kwanza.
Mkurugenzi Mkuu wa chama hicho, Dkt. Oduor Ong’wen, amesema kuwa Sifuna ana wajibu wa kuwasilisha misimamo rasmi ya chama na pia ana haki ya kutoa maoni yake binafsi katika masuala ya kitaifa.
“Katibu Mkuu ndiye msemaji rasmi wa ODM. Ana mamlaka kamili ya kueleza msimamo wa chama,” alisema Ong’wen, akizungumza Jumatano jijini Nairobi.
Amesema ODM, kama chama kinachozingatia misingi ya kidemokrasia, hakiwezi kumzuia kiongozi wake kutoa maoni yake.
“Katika mfumo wowote wa kidemokrasia, uhuru wa kujieleza ni haki ya msingi inayopaswa kuheshimiwa,” aliongeza.
Kauli ya Ong’wen imekuja kufuatia wimbi la ukosoaji dhidi ya Sifuna, ambaye hivi karibuni alieleza hadharani kuwa ODM inapitia mkanganyiko wa ndani unaosababisha mgawanyiko wa misimamo kuhusu masuala ya kitaifa na ushirikiano wa kisiasa.
Katika mahojiano ya moja kwa moja kwenye kipindi cha The Explainer kinachorushwa na runinga ya Citizen, Sifuna alieleza kuwa kwa sasa ni vigumu kueleza msimamo wa ODM kwa sababu ya kutokuwepo kwa uwiano wa mawasiliano miongoni mwa viongozi wa chama.
“Kwa sasa kuna mkanganyiko mkubwa. Zamani ilikuwa rahisi sana kuwa Katibu Mkuu wa ODM, lakini sasa ninapata ugumu kueleza msimamo wa chama,” alisema.
Aidha, Sifuna alitangaza kuwa makubaliano kati ya ODM na UDA hayana maana tena baada ya kifo cha mwalimu na mwanablogu Albert Ojwang, ambaye alifariki akiwa mikononi mwa polisi.
“Siku ambayo Albert Ojwang anafariki katika seli ya polisi, huo mkataba kwangu unakufa rasmi,” alisema kwa msisitizo.
“Albert hataweza kufaidika na makubaliano hayo, kwa hivyo hayana maana tena.”
Hata hivyo, Waziri wa Fedha na aliyekuwa Mwenyekiti wa ODM, John Mbadi, alimshutumu Sifuna kwa kauli zake alizozitaja kuwa za kugawa chama.
“Kati ya Kiongozi wa Chama na Katibu Mkuu, ni nani anayetoa uamuzi wa mwisho?” alihoji Mbadi, akisisitiza kuwa uteuzi wa mawaziri ulifanyika kwa baraka za Raila Odinga na baada ya mashauriano ya kina na Rais William Ruto.
“Nimefurahi kwamba Sifuna ameeleza kuwa hayo ni maoni yake binafsi,” aliongeza Mbadi, akikanusha kuwa matamshi ya Sifuna ni msimamo wa chama.
Kwa upande wake, Ong’wen alihitimisha kwa kuonya kuwa hadi sasa hakuna mwanachama yeyote aliyewasilisha ombi la kutaka Sifuna aondolewe, na iwapo litatokea, litashughulikiwa kwa kufuata katiba ya chama.
“Masuala kama hayo huamuliwa kupitia taratibu za ndani za kidemokrasia,” alisema.
Pia alilaani vikali matukio ya utekaji nyara na mauaji ya kiholela nchini.
“ODM haikubaliani na wimbi la utekaji nyara na mauaji. Vitendo hivi ni vya kukemewa vikali,” alihitimisha.
© Radio Jambo 2024. All rights reserved