Kindiki Ampongeza Raila kwa Kuweka Taifa Mbele ya Matamanio ya Binafsi

NYATIKE, KENYA, Julai 26, 2025 — Naibu Rais Kithure Kindiki amemimina sifa kwa Raila Odinga kwa mchango wake katika kuimarisha mshikamano wa kitaifa, akisema uzalendo wa kiongozi huyo unapaswa kuwa mfano kwa wanasiasa wengine.

Akizungumza Jumamosi katika hafla ya uwezeshaji kwa wananchi katika uwanja wa Ong’er, Kaunti ya Migori, Naibu Rais Kithure Kindiki alimtaja Raila Odinga kama kiongozi wa kitaifa ambaye ameweka mfano wa kuigwa kwa kutanguliza maslahi ya taifa kuliko siasa za mtu binafsi.

"Ninamshukuru Waziri Mkuu wa zamani Raila Odinga kwa moyo wake wa kizalendo, kwa maono yake na kwa kuelewa kuwa Kenya ni kubwa kuliko mtu yeyote binafsi. Wakati maslahi ya taifa yanakinzana na ya mtu binafsi, ni maslahi ya taifa yanayopaswa kushinda," alisema Kindiki.

Alieleza kuwa serikali ya Kenya Kwanza itaendelea kumuunga mkono Raila katika juhudi zake za kuleta uthabiti wa kitaifa na kuwa wataendelea kumsikiliza kutokana na tajriba yake katika siasa za Kenya.

"Tunamuunga mkono Raila anapomuunga mkono Rais wetu. Tunahakikishia Wakenya kuwa nchi iko salama na imara kwa sababu tunaye mzee mwenye busara ambaye anaweza kutushauri wakati changamoto zinapojitokeza," aliongeza.

Kindiki pia alisisitiza kuwa maendeleo hayatabagua maeneo kwa misingi ya kura walizopigia uchaguzi uliopita, akisema ahadi ya Rais William Ruto ni ya kuwatumikia Wakenya wote bila upendeleo.

"Rais Ruto aliahidi kuhudumia kila Mkenya sawa. Alianza kufanya hivyo hata kabla ya kushirikiana rasmi na Raila Odinga. Hata hapa Migori miradi ilianza kabla ya mpango wa serikali jumuishi," alisema.

Aidha, aliwabeza baadhi ya viongozi wa upinzani kwa kujaribu kupinga hatua za serikali huku wakijifanya kuwa na nguvu ya kisiasa ilhali hawana ushindani wa kweli.

"Upinzani wanaonekana wanafanya siasa sana kwa sababu sisi tumejikita katika kazi ya kuhudumia wananchi. Watarudi chini siku tutakapoamua kuingia ulingoni wa kisiasa," alitamba Kindiki.

Katika hafla hiyo, Kindiki aliandamana na viongozi wa ngazi ya juu serikalini wakiwemo Waziri wa Fedha John Mbadi, Kiongozi wa Wengi katika Seneti Aaron Cheruiyot, Gavana wa Migori Ochillo Ayacko, Mbunge wa Nyatike Tom Odege, Seneta wa Migori Eddie Oketch na Msaidizi binafsi wa Rais Farouk Kibet.