MARYLAND, MAREKANI, Julai 28, 2025 — Kikao cha jukwaa la miji kilichoandaliwa kwa Wakenya waishio Marekani kiligeuka uwanja wa mijadala mikali ya kisiasa, baada ya Naibu Rais wa zamani Rigathi Gachagua kukumbana na ukosoaji wa moja kwa moja kutoka kwa kijana wa kizazi cha Gen Z, Valentine Wanjiru Githae.
Tukio hilo lililotokea katika mji wa Maryland, lilivutia hisia kali huku kizazi kipya kikijitokeza kwa ujasiri kupinga siasa za kikabila.
Katika hali isiyotarajiwa, Valentine alisimama na kuchukua kipaza sauti kwa ujasiri mkubwa, na moja kwa moja kumkosoa Gachagua kwa kile alichokitaja kuwa siasa za kuchochea ukabila na kugawanya taifa.
“Mheshimiwa, tuko hapa kukuambia ukweli. Tukinyamaza kama Gen Zs, tumeangamia, na Kasongo atarudi madarakani,” alisema Valentine kwa sauti ya shauku iliyojaa uzalendo.
Valentine: "Sauti ya kizazi kipya lazima isikike"
Valentine alisisitiza kuwa vijana wa kizazi chake wamechoka na siasa zinazowagawa Wakenya kwa misingi ya kikabila.
Alichukua fursa hiyo kumtaka Gachagua aachane na siasa za kanda na kuanza kujiwasilisha kama kiongozi wa kitaifa mwenye uwezo wa kuwaunganisha wananchi wote.
“Lazima uanze kujiona kama kiongozi wa kitaifa, si wa kikundi fulani. Kizazi chetu hakiwezi tena kuvumilia siasa za kugawa watu kwa misingi ya asili au lugha,” aliongeza.
Valentine pia alikosoa vikali uamuzi wa Gachagua kuzungumza kwa lugha ya Kikuyu katika mkutano huo, akisema ulikuwa wa hadhara na ungehusisha lugha ya kitaifa ili kila mshiriki aweze kuelewa.
“Makosa ya kwanza ni kuzungumza Kikuyu kwenye mkutano huu. Wengi hapa hawaielewi. Hiyo ni ishara ya kuwabagua wengine kwa lugha,” alieleza.
Gachagua Ajibu Kwa Msisitizo
Gachagua hakukaa kimya. Kwa sauti ya utetezi, alieleza kuwa sababu ya msimamo wake ni hali halisi inayokumba watu wa Mlima Kenya, hasa baada ya maandamano ya kupinga serikali yaliyoibuka miezi iliyopita.
“Bi yangu, kama unajua yaliyotokea wiki mbili kabla sijaondoka Kenya, utajua kwa nini lazima nitete watu wa Mlima Kenya,” alisema kwa msisitizo.
Kwa mujibu wa Gachagua, jamii ya Mlima Kenya imekuwa ikilengwa kwa namna isiyo ya haki.
“Asilimia 92 ya waliokamatwa kwa makosa ya ugaidi walitoka Mlima Kenya. Biashara za watu wetu zilivunjwa. Hii si bahati mbaya, ni mpango wa kuwanyamazisha,” alidai.
“Si lazima niwe rais” – Gachagua
Katika hatua ya kuonyesha utayari wa kujitoa kwa jamii yake, Gachagua alisisitiza kuwa hana haja ya cheo chochote iwapo utetezi wa jamii yake utamgharimu kisiasa.
“Mimi si lazima niwe rais. Kama kusimama na watu wangu kutanifanya niwe mtu wa kawaida, basi ni sawa,” alisisitiza.
Aliendelea kuhusisha matatizo ya kiuchumi yanayokumba eneo la Mlima Kenya na kile alichokitaja kuwa ni vita vilivyotangazwa dhidi ya jamii hiyo na serikali ya sasa.
“Tangu William Ruto aitangaze vita dhidi ya Mlima, watu wameacha kulipa ushuru, wameacha kuwekeza. Wanangoja serikali, kama ninyi mlivyoshikilia pesa zenu hapa,” alisema alipohutubia Wakenya mjini Boston.
Kizazi Kipya Chakataa Ukabila
Mkutano huo uliibua mjadala mpana kwenye mitandao ya kijamii, huku wengi wakimpongeza Valentine kwa ujasiri wake na msimamo wa kizalendo.
Wengine walimkosoa Gachagua kwa kile walichokitaja kuwa siasa za kupandikiza chuki.
© Radio Jambo 2024. All rights reserved