NOW ON AIR

“Hii Barabara Si Yako, Rais!” – Seneta Methu Amchemkia Ruto

Ziara ya Rais Ruto katika eneo la Mlima Kenya sasa imegeuka mtihani wa kisiasa, huku kauli ya Seneta Methu ikizua maswali kuhusu uhalali wa ahadi za maendeleo na mshikamano ndani ya serikali yake.

na Tony Mballa

Habari01 August 2025 - 17:25

Muhtasari

Seneta wa Nyandarua John Methu amezua gumzo kwa kumkejeli Rais William Ruto hadharani, akidai kuwa ziara ya Rais hiyo ijayo ni ya "kuzindua miradi ya zamani" ambayo haikuanza wala kukamilishwa chini ya utawala wa sasa. Kauli hiyo imechochea mvutano wa kisiasa huku uungwaji mkono wa Mlima Kenya kwa Ruto ukizidi kuyumba.
Katika hali inayoashiria migawanyiko ndani ya serikali ya Kenya Kwanza, Seneta Methu amesema wazi kuwa wananchi wa Mlima Kenya wameanza kutilia shaka dhamira ya Rais Ruto, wakihisi kuwa wamepuuzwa na kwamba serikali inazindua miradi ya serikali zilizopita badala ya kushughulikia matatizo mapya.

NAIROBI, KENYA , Agosti 1, 2025 — Ziara inayosubiriwa kwa hamu ya Rais William Ruto katika eneo la Mlima Kenya imeibua mjadala mkali baada ya Seneta wa Kaunti ya Nyandarua, John Methu, kumkejeli waziwazi kwa kile alichokitaja kuwa ni uzinduzi wa miradi ya zamani.

Methu amemshambulia Rais Ruto kwa madai ya kutaka kuzindua miradi ya zamani iliyoisha kabla ya uchaguzi wa mwaka 2022, akisema hatua hiyo ni dhihaka kwa wakazi wa Mlima Kenya.

"Rais Azindua Kilichokwisha": Methu Apasha Moto

Kupitia ukurasa wake wa mtandao wa X (zamani Twitter) mnamo Ijumaa, Agosti 1, 2025, Seneta Methu alieleza kwa dhihaka kuwa Rais Ruto atakuwa akizindua barabara ya Gilgil hadi Machinery ambayo tayari ilikamilika miaka mitatu iliyopita.

“Mheshimiwa William Samoei Ruto atazindua barabara ya kutoka Gilgil hadi Machinery katika kipindi cha wiki mbili zijazo; barabara hiyo ilijengwa mwaka 2019 na kukamilika mwaka 2022, isipokuwa daraja moja ambalo sasa limekamilika,” aliandika Methu.

Aidha, aliongeza kuwa Rais pia atazindua Maporomoko ya Maji ya Thompson mjini Nyahururu na kuanzisha rasmi mradi wa kilimo cha viazi katika Kaunti ya Nyandarua.

Kauli hiyo imeibua msisimko mkubwa wa kisiasa huku wachambuzi wakitafsiri ujumbe huo kama shambulizi la moja kwa moja kwa Rais, likielekeza mashaka kuhusu uhalali na uzito wa ziara hiyo.

Wasiwasi Mlima Kenya: Ziara ya Kisiasa au Kufuta Aibu?

Kwa miezi kadhaa sasa, Rais Ruto hajaonekana mara kwa mara katika eneo la Mlima Kenya, hasa baada ya uhusiano wake na aliyekuwa Naibu wake Rigathi Gachagua kuvunjika wazi.

Wakazi wa eneo hilo wamesikika mara kadhaa wakilalamikia hali ya kusahaulika, licha ya kuwa walimuunga mkono Rais kwa wingi wakati wa uchaguzi mkuu wa mwaka 2022.

Katika mkutano wa hivi majuzi uliofanyika mjini Naivasha, wabunge kadhaa wa muungano tawala kutoka Mlima Kenya walieleza hadharani kuwa inazidi kuwa vigumu kuuza ajenda ya Rais kwa wapiga kura.

Walilalamikia pia kejeli na dhihaka wanazopokea kutoka kwa maafisa wa ngazi ya juu serikalini, baadhi wakiwa ndani ya Ikulu yenyewe.