Ruto: Ni Raila Pekee Alinikosesha Usingizi, Wengine Nitawabwaga

Rais William Ruto amesema wapinzani wake hawana mipango ya kweli na hawana uwezo wa kumkabili kisiasa. Alitoa kauli hiyo katika ziara yake ya maendeleo ya siku nne katika Kaunti ya Kakamega.

“Watu hawa hawana akili za kupanga maendeleo. Wanajua tu maneno ya kugawanya watu kwa misingi ya ukabila na chuki. Mpinzani wa kweli angekuwa Raila, lakini sasa hata wengine, nitawashinda kwa urahisi 2027,” alisema.

Ruto alisisitiza kuwa kaulimbiu za siasa kama ‘One Term’ na ‘Kasongo’ haziwezi kumshinda. “Bila mpango wa maendeleo, maneno haya hayana maana. Mimi nina mpango wa kuleta maendeleo kwa wananchi,” alisema.

Rais aliwahimiza wafuasi wa ODM na Azimio la Umoja kushirikiana naye chini ya serikali ya umoja mpana.

“Hakuna eneo litakaloachwa nyuma. Tutahakikisha maendeleo yanawafikia wote bila ubaguzi wa kisiasa,” alisema.

Miradi ya Maendeleo Kakamega

Ruto alitangaza miradi kadhaa ya maendeleo katika Kaunti ya Kakamega:

• Kaya 34,000 kuunganishwa na umeme kwa gharama ya Sh2.5B.
• Barabara mpya kujengwa kwa gharama ya Sh2.2B.
• Hospitali ya Rufaa ya Kakamega Level Six kukamilika ndani ya miezi tisa (Sh1B).
• Uwanja wa Bukhungu kukamilika (Sh1.4B).

Uzinduzi wa Hospitali ya Butere

Rais Ruto, akiwa na Gavana Fernandes Barasa, alizindua rasmi Hospitali ya Kaunti ya Butere, iliyojengwa kuanzia 2022. Alisema serikali itatoa Sh150M kwa ajili ya vifaa chini ya Mpango wa Kitaifa wa Vifaa vya Tiba (NESP).

“Hospitali hii itasaidia wananchi wa Butere na maeneo jirani kupata huduma za afya bila kusafiri mbali,” alisema Ruto.

Gavana Barasa alimshukuru Rais na kusema mpango huu utaisaidia kaunti kutekeleza ajenda ya afya kwa wote.

Uhusiano na Utendaji wa NESP

NESP, iliyotengenezwa baada ya kuisha kwa MES mnamo 2023, inalenga kuhakikisha vifaa vya kisasa vinapatikana katika hospitali za kaunti bila gharama ya awali. Wauzaji wanatoa huduma, matengenezo na maboresho kulingana na malipo kwa huduma.

Rais Ruto alisema hatatumbukia kwenye siasa za majibizano. “Nitazungumza maendeleo, nitajenga barabara, nitaleta umeme, nitakamilisha hospitali. Wapinzani waendelee na kelele zao,” alisema.

Ruto alisisitiza kuwa serikali yake itahakikisha kila mkenya ananufaika bila ubaguzi wa kisiasa.