Waziri mpya wa usimamizi wa huduma za umma, utendakazi na uwasilishaji, Moses Kuria amekanusha kupendekeza kuwa Wakenya watalazimika kulipa ili kupokea huduma katika vituo vya Huduma.
Katika taarifa kwenye akaunti yake ya Twitter, waziri huyo wa zamani wa Biashara alidai kuwa vyombo vya habari viliripoti vibaya kuhusu pendekezo lake kuhusu ni nani anayepaswa kulipa katika vituo hivyo.
Kuria alibainisha kuwa wananchi tayari wanalipa idara mbalimbali za serikali kwa huduma lakini idara hizo zimekuwa hazilipi vituo vya Huduma kwa kusambaza huduma zao, jambo ambalo sasa anapendekeza liwe linatendeka.
“KAMA KAWAIDA, vyombo vya habari vinapotosha nilichosema kuhusu Huduma Centres. Umma tayari unalipa idara za serikali kwa huduma zinazotolewa kupitia Huduma Centres. LAKINI idara hizo HAZILIPII Huduma Centers kwa kusambaza huduma zao kwa umma na hivyo kulazimisha Huduma Centers kutegemea 100% ya Usaidizi wa Fedha,” Kuria alisema kupitia mtandao wa Twitter siku ya Jumatatu jioni.
Aliongeza, “Idara za aina hiyo ndizo zinazolipa ada kwa ajili ya utumishi na sio za umma. Lakini itakuwa siku mbaya kwa vyombo vya habari kama havitaniwakilisha vibaya.”
Katika klipu iliyo mikononi mwa Radio Jambo, waziri huyo alirekodiwa akidai kwamba wataanzisha ada ya huduma zinazotolewa katika vituo vya Huduma.
''Umekuwa ukifurahia huduma hizi bila kulipa, hakuna tena chakula cha mchana cha bure. Unapaswa kulipia, tutaanzisha ada ya huduma kwa huduma ya serikali na huduma ya kibinafsi ili kusaidia biashara yetu ya kielektroniki kwa sababu Kituo cha huduma kitakuwa uti wa mgongo wa biashara ya mtandaoni,” Kuria alisema.
Waziri alisema hayo wakati wa kukabidhiwa rasmi Idara ya Utumishi wa Umma, Utendaji na Usimamizi wa Utoaji.
Mbunge huyo wa zamani alisema ada kwa huduma itawezesha Vituo 52 vya huduma kote nchini kupata mapato na kupunguza shinikizo kwenye hazina.