Wasanii wakitumbuiza wakati wa sherehe ya ufunguzi wa Michezo ya 6 ya Ufukweni ya Asia mjini Sanya, mkoa wa Hainan kusini mwa China, Aprili 22, 2026. (Xinhua/Li Ga)
Michezo ya 6 ya Ufukweni ya Asia ilifunguliwa rasmi Jumatano jioni katika mji wa mapumziko wa kitropiki wa Sanya, kusini mwa mkoa wa Hainan, China, huku sherehe ya ufunguzi ikifanyika katika bustani ya pwani ya Yasha.
Mshauri wa Baraza la Serikali la China, Shen Yiqin, alitangaza rasmi kufunguliwa kwa michezo hiyo baada ya jumla ya ujumbe 45 kupita katika gwaride la mataifa, katika tukio hili la bara ambalo awali lilipangwa kufanyika mwaka 2020.
Sherehe hiyo ya dakika 75 iliandaliwa kwa sehemu tatu zenye kaulimbiu ya “Shauku ya Bahari na Anga,” “Ndoto za Bahari ya Bluu” na “Kuunganisha Dunia,” zikionesha utamaduni wa bahari na utofauti wa bara la Asia.
Baada ya kuahirishwa mara mbili, hasa kutokana na janga la COVID-19, michezo ya Sanya imevutia washiriki takriban 10,000, wakiwemo zaidi ya wanariadha 1,600.
Ujumbe wa China ukipita kwa gwaride wakati wa sherehe ya ufunguzi wa Michezo ya 6 ya Ufukweni ya Asia. (Xinhua/Xu Bingjie)
Michezo hii ni ya kwanza kwa Hainan kuandaa tukio la michezo ya ufukweni katika kiwango cha bara. Pia ni tukio kubwa la kwanza la kimataifa tangu uzinduzi wa Bandari Huru ya Biashara ya Hainan Desemba mwaka jana.
“Ni wakati ambao Asia imekuwa ikiusubiri,” alisema Rais wa Baraza la Olimpiki la Asia, Sheikh Joaan bin Hamad Al Thani. “Tunaufanya katika taifa lenye rekodi ya kipekee ya kuandaa mashindano ya kimataifa ya michezo.”
Aliongeza kuwa China imekuwa mwenyeji wa Michezo ya Olimpiki ya majira ya joto na baridi, Michezo ya Asia na mashindano mengine mengi, na sasa inaongeza Michezo ya 6 ya Ufukweni ya Asia Sanya 2026 katika historia hiyo.
Sheikh Joaan bin Hamad Al Thani, rais wa Baraza la Olimpiki la Asia (OCA), akizungumza wakati wa sherehe ya ufunguzi wa Michezo ya 6 ya Ufukweni ya Asia. (Xinhua/Pan Yulong)
Kwa niaba ya wanachama wote 45 wa Baraza la Olimpiki la Asia, Sheikh Joaan aliishukuru serikali ya China, mji wa Sanya na Kamati ya Olimpiki ya China kwa maandalizi hayo.
“Michezo hii inatuleta pamoja kwa namna ambayo ni michezo pekee inaweza kufanya,” alisema. “Tofauti zetu ndizo nguvu zetu, lakini shauku ya michezo inatuunganisha.”
Mkurugenzi mkuu wa sherehe hiyo, Huang Peiling, alisema hafla hiyo ilivunja mtindo wa kawaida kwa kuifanya iwe ya kushirikisha zaidi watazamaji badala ya kuangalia tu.
Wasanii wakitumbuiza wakati wa sherehe ya ufunguzi wa Michezo ya 6 ya Ufukweni ya Asia. (Xinhua/Pan Yulong)
Kinyago rasmi cha michezo hiyo, paa aina ya Eld anayejulikana kama “Yaya,” kilikuwa sehemu muhimu ya sherehe, kikihusisha hadithi ya zamani, sasa na baadaye ya Sanya.
Sherehe ya kuwasha mwenge ilikuwa ya kipekee, ambapo wabeba mwenge sita walikutana katikati ya jukwaa lenye umbo la “Pete ya Mwanga wa Jua,” kuwasha moto uliogeuka kuwa mwenge mkubwa uliomulika bahari na anga.
Hafla hiyo ilihitimishwa kwa wimbo rasmi “See ya in Sanya,” uliotumbuizwa na wajitolea 20 wa michezo hiyo.
Wabeba mwenge wakikimbia wakati wa sherehe ya ufunguzi wa Michezo ya 6 ya Ufukweni ya Asia. (Picha na Ma Zihan/Xinhua)
Michezo hiyo itafanyika kuanzia Aprili 22 hadi 30, ikijumuisha michezo 14, taaluma 15 na mashindano 62. Hii ni mara ya pili kwa China kuandaa Michezo ya Ufukweni ya Asia, baada ya toleo la mwaka 2012 lililofanyika Haiyang, mkoa wa Shandong.
China imetuma ujumbe wa watu 255, wakiwemo wanariadha 171, kushiriki katika michezo 13 na mashindano 60—ikiwa ni ushiriki mkubwa zaidi kuwahi kufanywa na taifa hilo katika historia ya michezo hiyo.