Kenya yapokea chanjo zaidi za AstraZeneca

Kenya imepokea zaidi ya dozi 130,000 za chanjo ya AstraZeneca Covid-19.

Chanjo hizo, ambazo zilifika Nairobi siku ya Alhamisi asubuhi, zilitoka Jamhuri ya Kidemokrasia ya Congo, ambayo ilisema haikuwa na uwezo wa kutoa dozi milioni 1.3 kabla ya kumalizika kwa muda wa matumizi Juni 24.

DRC ilipokea dozi milioni 1.7 kupitia Covax mnamo Machi 2 lakini imetumia tu chanjo 400,000 baada ya kuzuka kwa hofu kuwa chanjo hiyo inaweza kusababisha kuganda kwa damu.

Unicef ​​iligawanya dozi zilizobaki kwa nchi kadhaa ikiwa ni pamoja na Kenya, Jamhuri ya Afrika ya Kati, Ghana, Senegal na Togo.

Mkuu wa kikosi kazi cha utoaji wa chanjo za Covid-19 Dkt Willis Akhwale alithibitisha kuwa dozi hizo zilifika salama mjini Nairobi.

Alisema dozi zingine 136,000 zilibaki kutoka kwa zoezi la kwanza la chanjo nchini Kenya.

Jumla ya dozi 266,000 sasa zitapewa Wakenya ambao walipokea dozi ya kwanza mnamo mwezi Machi.

“Wakenya wanapaswa kutarajia kupokea chanjo ya pili kuanzia mapema wiki ijayo. Tutaanza na Wakenya ambao walipokea dozi ya kwanza mwezi Machi kwa sababu wanahitaji kupewa ndani ya kipindi cha wiki 12, ”Akhwale alisema.

Hii inamaanisha kuwa Kenya imewapa chanjo karibu watu 950,000 tangu zoezi hilo lilipoanza Machi 5.

Kenya ilipokea dozi milioni 1.02 za chanjo ya AstraZeneca-Oxford kutoka Covax mnamo Machi 3, na msaada wa dozi 100,000 kutoka kwa serikali ya India Machi 11.

Dkt. Akhwale alisema kwamba Kenya pia itapokea karibu dozi milioni mbili za chanjo ya Johnson & Johnson mwezi Agosti.