Sijazungumza na Uhuru kwa miezi kadhaa lakini nitampigia simu hivi karibuni - Ruto

Rais mteule William Ruto amefichua kwamba hajazungumza na Rais Uhuru Kenyatta kwa miezi mingi.

Haya yanajiri licha ya kwamba alitangazwa kuwa Rais mteule na IEBC mnamo Agosti 15. Inatarajiwa kuwa rais aliyeko madarakani angemshirikisha katika masuala ya mpito.

Katika hotuba yake ya kwanza kwa taifa baada ya Mahakama ya Juu kuidhinisha ushindi wake, Ruto alisema atawasiliana na Rais anayeondoka baada ya hotuba yake kujadili mbinu za mpito.

"Nitampigia simu Rais Uhuru Kenyatta," Ruto alisema.

"Hatujazungumza kwa miezi lakini hivi karibuni nitapiga simu ili tufanye mazungumzo juu ya mchakato wa mpito."

Ruto alisema Uhuru alifanya kazi kwa bidii kwa njia zake mwenyewe katika kumuunga mkono mgombeaji wake kipenzi Raila Odinga lakini akabainisha kuwa Wakenya walifanya uamuzi wao.

“Hatuna suala na uchaguzi wa kidemokrasia wa Wakenya. Nilipomuunga mkono sikumpa sharti la kuniunga mkono,” alisema.

"Tutabaki, marafiki, kama tumekuwa katika muktadha wa tulipo na tunatarajia kujenga msingi uliopo."