Chelsea Yamteua McFarlane Kuchukua Nafasi ya Maresca

LONDON, UINGEREZA, Ijumaa, Januari 2, 2026 – Calum McFarlane ameishi “masaa 24 ya kichaa” baada ya kuthibitishwa kuwa atakuwa kocha wa muda wa Chelsea, jukumu lililomkuta ghafla kufuatia kuondoka kwa Enzo Maresca siku ya Mwaka Mpya.

“Imekuwa safari ya haraka sana, lakini pia ya kufurahisha,” alisema McFarlane.

“Ni uzoefu wa kipekee, na ninajisikia chanya kabisa.”

Licha ya ukubwa wa jukumu hilo, McFarlane amesisitiza kuwa hatishwi na changamoto ya kuikabili Manchester City chini ya Pep Guardiola.

Akizungumza kabla ya mechi hiyo, McFarlane alikanusha vikali madai kuwa huu ni wakati wake wa kujithibitisha kama kocha.

“Huu si mchezo kuhusu mimi, si kuhusu makocha. Ni kuhusu Chelsea dhidi ya City. Kazi yetu ni kuwapa wachezaji mazingira bora ya kucheza na kutekeleza majukumu yao.”

Kauli hiyo imeakisi mtazamo wa unyenyekevu na umoja unaotawala kambini Stamford Bridge katika kipindi hiki kigumu.

Kocha aeleza mpango wake dhidi ya City

McFarlane amethibitisha kuwa amekuwa na muda wa kutosha kuchambua Manchester City, akisema walipata taarifa rasmi mapema na hata wakatazama mchezo wa City uliochezwa usiku uliopita.

“Tulipata muda wa kuchambua michezo yao na kupata mawazo ya jinsi ya kujiandaa,” alisema.

Hata hivyo, alikiri wazi kuwa Chelsea wanakutana na timu iliyo katika kiwango kizuri, lakini akasisitiza kuwa hawasafiri kwenda Etihad kwa hofu.

Kikosi, majeruhi na Cucurella

Kuhusu uteuzi wa kikosi, McFarlane alisema atafanya kazi kwa karibu na kitengo cha afya. “Tuna wachezaji wanaorejea baada ya kuuguza majeraha mbalimbali, hivyo tutachagua kikosi bora ambacho kiko tayari kushindana,” alisema.

Kuhusu Marc Cucurella, McFarlane alithibitisha kuwa mchezaji huyo amerudi mazoezini, lakini bado uamuzi wa mwisho haujafanywa.

Reece James asifiwa kwa uongozi

Kocha huyo alimtaja nahodha Reece James kama mhimili muhimu katika siku hizi chache za mpito.

“Reece amekuwa kiongozi wa kweli,” alisema. “Ameunga mkono wachezaji na benchi la ufundi. Kuna umakini mkubwa kambini.”

McFarlane alisema wachezaji walionesha ari na njaa kubwa wakati wa mazoezi, ishara kwamba timu iko tayari kupambana.

Msaada kutoka kwa wamiliki

McFarlane pia alifichua kuwa amezungumza moja kwa moja na wamiliki na wakurugenzi wa Chelsea, akisema wameonyesha imani kamili kwake.

“Wamekuwa msaada mkubwa. Wametupa kila tunachohitaji kufanikiwa. Tuko pamoja,” alisema.

Aliongeza kuwa uzoefu wake wa miezi sita ndani ya klabu umejengwa juu ya mradi mzuri unaotoa nafasi kwa vipaji vya vijana.

McFarlane na Maresca

Akizungumzia uhusiano wake na Maresca, McFarlane alisema ulikuwa wa kawaida kati ya kocha wa U21 na kocha wa timu ya kwanza, akibainisha kuwa Maresca aliwahi kuwapa vijana wengi nafasi ya kucheza.

Chelsea katika kipindi cha mpito

Wakati uvumi wa makocha kama Andoni Iraola kuhusishwa na kazi ya Chelsea ukiendelea, McFarlane amesisitiza kuwa jukumu lake ni moja tu: kuandaa timu kwa mechi ya Jumapili.

“Maelekezo niliyopata ni kuwaandaa wachezaji kwa Manchester City. Hilo ndilo najua,” alisema.