Shabana FC waliibuka na ushindi mwembamba wa bao 1-0 dhidi ya Mathare United katika mechi ya Ligi Kuu ya Kenya iliyochezwa kwenye uga wa Nyayo jijini Nairobi Stadium Jumatano.
Nahodha George ‘Dizzo’ Onyango alipachika mpira wavuni katika dakika ya 90+8 na kuwahakikishia Tore Bobe alama tatu za thamani, ushindi uliorejesha matumaini na kuamsha upya azma yao ya kuwania taji lao la kwanza katika mashindano hayo.
Nahodha George 'Dizzo' Onyango alipachika mpira wavuni dakika ya 90+8 na kuwapa Tore Bobe alama tatu muhimu zilizo fufua azma yao upya katika mbio za kunyakua tajinlao la kwanza katika mashindano hayo.
Ushindi huo unawapandisha Shabana hadi alama 40, sawa na AFC Leopards walio nafasi ya pili, huku vinara Gor Mahia wakisalia kileleni kwa alama 46 baada ya michezo 21.
Mechi hiyo ilikuwa ya ushindani mkali kuanzia mwanzo hadi mwisho.
Shabana walitawala umiliki wa mpira kwa vipindi virefu, wakijaribu kupenya safu ya nyuma ya Mathare iliyojipanga kwa nidhamu. Mathare, waliokuwa nafasi ya 11 na alama 26 kabla ya pambano hilo, walilenga kulinda na kusaka nafasi za kushtukiza.
Kwa dakika 90, ngome ya Mathare ilisimama imara.
Lakini muda wa nyongeza uligeuka kuwa wa majonzi kwao.
Mpira ulizagaa ndani ya eneo la hatari, Onyango akawa wa kwanza kuufikia na kuupachika wavuni kwa shuti la chini lililompita kipa. Benchi la Shabana lililipuka kwa shangwe huku mashabiki wakisherehekea ushindi uliokuja kwa jasho.
Okidi: Ushindi wa Imani na Subira
Kocha wa Shabana, Peter Okidi, alisema ushindi huo ni matokeo ya uvumilivu na kuamini hadi dakika ya mwisho.
“Tulijua haitakuwa rahisi. Mathare walijipanga vizuri sana,” alisema Okidi baada ya mechi.
“Lakini niliwaambia wachezaji wangu wasikate tamaa. Ukiendelea kushinikiza, nafasi itatokea. Leo tumelipwa kwa subira yetu.”
Okidi aliongeza kuwa ushindi katika mechi ngumu kama hiyo unaipa timu yake nguvu ya kuendelea kupambana katika mbio za ubingwa.
“Hizi ndizo alama zinazotofautisha timu inayopigania ubingwa na nyingine. Lazima ushinde hata kama ni dakika ya mwisho,” alisisitiza.
John Kamau: Tulipoteza Umakini Sekunde Moja
Kocha wa Mathare United, John Kamau, alieleza masikitiko yake kufuatia kupoteza pointi muhimu mwishoni mwa mchezo.
“Inaumiza kupoteza hivi. Tulifanya kazi kubwa kwa dakika zote,” alisema Kamau.
“Lakini tulipoteza umakini sekunde moja tu, na tukalipia. Katika ligi hii, makosa madogo yanaadhibiwa.”
Kamau hata hivyo alisifu nidhamu ya kikosi chake na kuahidi kurekebisha dosari hizo kabla ya mechi zijazo.
“Kama tutaendelea kucheza kwa mpangilio huu, tutapata matokeo mazuri. Tunahitaji tu kumaliza mechi kwa nguvu sawa hadi mwisho,” aliongeza.
Mbio za Ubingwa Zazidi Kuchacha
Matokeo hayo yanaongeza presha kwa timu zilizo kileleni.
Shabana sasa wako sawa kwa alama na AFC Leopards, huku wakisubiri matokeo ya mechi yao dhidi ya KCB FC.
Gor Mahia hawana nafasi ya kupoteza alama kirahisi, kwani timu zinazowafuatia zimeanza kupunguza pengo.
Chini ya jedwali, mabingwa watetezi Kenya Police FC watavaana na Sofapaka FC katika mechi muhimu ya kusaka alama tatu.
Kadri msimu unavyoingia hatua ya mwisho, kila ushindi una uzito mkubwa.
Kwa sasa, Shabana wameonyesha kwamba wako tayari kupambana hadi sekunde ya mwisho.
Na Jumatano jioni katika Uwanja wa Nyayo, sekunde hiyo ilikuwa ya George Onyango.
