Bahati: Sh1M Ni Kidogo, Bajeti Yangu Ni Sh3M kwa Wiki

NAIROBI, KENYA, Agosti 29, 2025 — Msanii wa muziki Kevin Bahati amejibu vikali lawama za mashabiki baada ya kuchelewa kutimiza ahadi yake ya Sh1 milioni kwa Harambee Stars.

Bahati ameibua gumzo baada ya  kuchelewa kwake kukabidhi Sh1 milioni aliyoahidi kikosi hicho kilichoshinda Morocco katika mashindano ya CHAN.

Katika video aliyochapisha kwenye ukurasa wake wa Facebook, Bahati alifafanua kuwa hajabadilisha nia, bali alikumbana na changamoto za kiutaratibu zilizomzuia kukutana na wachezaji.

Bahati alikanusha vikali madai kwamba hana uwezo wa kifedha.

“Naskia watu wakisema sijatimiza ahadi kwa sababu mimi sina pesa. Eti nimefilisika. Jamani, hebu muache utani. Sh1 milioni ni nini kwangu? Hiyo ni pesa ndogo sana. Mimi hutumia Sh3 milioni kwa wiki moja pekee. Kwa hivyo siwezi kushindwa kutoa milioni moja,” Bahati alisema akiwa amevalia suti ya kahawia.

Kwa mujibu wake, makamu wa rais wa Shirikisho la Soka la Kenya (FKF), McDonald Mariga, ndiye aliyemzuia kuwasilisha mchango huo.

Msanii huyo alikiri kuwa asingependa kutuma pesa kwa njia ya simu au benki, akisisitiza umuhimu wa kuwapatia wachezaji hela hizo moja kwa moja.

“Siwezi kutuma tu. Nataka nitoe hii pesa kwa mikono yangu, ili kuwe na ushahidi kuwa nilitimiza nilichoahidi,” Bahati aliongeza.

Kwa kuonyesha jitihada zake, aliweka wazi pia jumbe za WhatsApp alizotuma kwa Mariga akitaka nafasi ya kukutana na wachezaji, akidai hakupata mwitikio mzuri.

“Nimejaribu mara kadhaa kufikisha hii Sh1 milioni, lakini Mariga amenizuia. Hata nikimtafuta kupanga siku ya kukutana na wachezaji, anakaa kimya. Mimi nataka kupeleka kwa mikono yangu, sio kutuma tu, kwa sababu Wakenya wanataka proof.”

Bahati alimwelekezea lawama moja kwa moja McDonald Mariga, akidai hajaruhusiwa kumfikishia timu zawadi hiyo.

Lawama Zake kwa Mariga

Kwa upande wake, Bahati alimlalamikia Mariga kwa kumzuia kutimiza ahadi yake:

“Nilitaka tu kupeana hii hela. Sijui kwa nini Mariga alinikatiza, labda ana mambo yake. Lakini mimi bado nipo tayari kushika mikono ya vijana wetu na kuwapa Sh1M niliyoahidi.

Jumbe Zafichuliwa

Bahati pia aliweka wazi maandiko aliyodai kumwandikia Mariga kupitia WhatsApp:

“Good Morning Senior, pole nilikosa simu yako. Nimekuwa Naivasha kwa family vacation na pia shoot ya client. Najua wiki hii ni muhimu kwa mazoezi ya timu, kwa hivyo nikichelewa tafadhali nielewe.

Licha ya shinikizo, Bahati alisisitiza atakabidhi zawadi hiyo kwa mikono yake.

“Nataka nifanye hivi next week first thing. Hii yangu ningetuma, lakini Wakenya wanataka proof nikipeana, kwa hivyo naomba nilete mwenyewe.”

“Sitaki kutuma kwa simu, sitaki kufanya kimya. Mimi nataka Wakenya waone Bahati anatimiza ahadi yake. Harambee Stars walitupa furaha, na mimi lazima nitoe shukrani.”

FKF na Mariga Wanyamaza

Hadi sasa, Mariga na FKF hawajajibu madai hayo. Wadau wa michezo wameonya kuwa sakata kama hizi huchafua hadhi ya timu ya taifa.

Mashabiki Wagawanyika

Kauli za Bahati zimezua mjadala mkali mitandaoni. Baadhi ya mashabiki walimtetea wakisema nia yake ni ya dhati, ilhali wengine waliona ni kiki na mbwembwe zisizo na maana.

Hata hivyo, msanii huyo aliendelea kushikilia msimamo wake kwamba ahadi yake haijabadilika, na kuwa ataitimiza kwa masharti aliyoweka.

Baada ya video hiyo, mitandao ya kijamii ililipuka kwa maoni mchanganyiko. Baadhi walimshutumu Bahati kwa kujigamba, huku wengine wakimtetea.

Mtumiaji mmoja wa X aliandika: “Bahati anajidharau akisema milioni moja ni kidogo. Wachezaji wa Harambee Stars wangepokea kwa mikono miwili.”

Lakini shabiki mwingine aliteta: “Kama kweli Mariga amemzuia, basi si haki kumlaumu Bahati pekee. FKF nayo ibebe lawama.”

Mchambuzi Collins Odhiambo alisema: “Ahadi zinazohusisha Harambee Stars zinahitaji uangalifu. Kama nia ya Bahati ilikuwa nzuri, basi FKF ilipaswa kuweka uratibu ili pesa ziwasilishe bila kelele.”

Mustakabali wa Pesa Hiyo

Kwa sasa, bado haijulikani lini wachezaji wa Harambee Stars watapokea Sh1 milioni ya Bahati. Lakini msanii huyo anaonekana kusimama imara kwenye msimamo wake.

“Nitakuja mwenyewe. Nitaweka pesa mezani. Wachezaji wataipokea. Hiyo ndiyo proof.” Bahati alisema huku akifunga mjadala wake.