NAIROBI, KENYA, Jumatano, Oktoba 8, 2025 – Mwanamuziki mashuhuri Esther Akoth, almaarufu Akothee, ametoa ujumbe mzito kwa mashabiki na wasanii wenzake, akiwataka kuacha kuishi maisha ya “filamu” yanayolenga tu kuwapendeza watu mitandaoni.
Kupitia ukurasa wake wa Instagram, Akothee alisema wasanii wengi wamekuwa wakiishi maisha ya kujidai, huku nyuma ya pazia wakipambana na changamoto za kifedha na kisaikolojia.
“Wengi wetu ni waigizaji. Tunavaa kwa ajili ya picha, tunapiga picha, tunaposti, halafu tunarudi nyumbani kula sukuma wiki na ugali. Baada ya hapo, tunalala na kesho tunarudia mchezo uleule,” aliandika Akothee kwa ucheshi lakini kwa ujumbe mzito.
Amesema baadhi ya wasanii wamefikia hatua ya kutangaza vifo vyao kwa kiki, halafu baadaye kudai akaunti zao zilidukuliwa ili kupata umaarufu na wafuasi zaidi.
“Wengine wanaweza kutangaza hata kifo chao ili kupata ‘likes’ na ‘comments’. Jamani, muamke! Maisha si mashindano ya mitandaoni,” alisema Akothee.
Mwanamuziki huyo alisisitiza kuwa mashabiki wasichukue maisha ya wasanii kama kipimo cha mafanikio yao. “Mashabiki wangu, tafadhali msijifananishe nasi. Wengi wenu mnaishi maisha bora kuliko baadhi yetu,” alisema kwa uwazi.
Kauli yake imezua mjadala mkali katika mitandao ya kijamii, wengi wakikubaliana naye kuwa wasanii wengi Kenya wanaendesha maisha yanayofanana na maigizo ya sinema.
Baadhi ya wafuasi wake walimsifu kwa kusema anasema ukweli unaowasumbua wengi. “Akothee ni mkweli sana, anasema yale wasanii wengi wanaogopa kusema,” aliandika shabiki mmoja kwenye X (zamani Twitter).
Hata hivyo, wengine walimtaka Akothee awe na hekima zaidi katika kauli zake, wakidai ujumbe wake unadhalilisha tasnia ya burudani.
Akothee, anayejulikana kwa ujasiri na uhalisia wake, alimalizia ujumbe wake kwa kejeli akisema:
“Ukisikia nimeguswa na maneno haya, tafadhali piga simu polisi waniweke ndani. Niko Wales sasa hivi!”
Kauli hiyo imeendelea kuvuma mitandaoni, huku ikichochea mjadala mpana kuhusu presha ya umaarufu, matumizi ya mitandao, na athari za kuishi maisha yasiyo halisi kwa ajili ya umaarufu.
Wachambuzi wa utamaduni wanasema ujumbe wa Akothee unaibua hoja nzito kuhusu usalama wa kisaikolojia wa wasanii, hasa katika enzi ya mitandao ya kijamii ambapo taswira ya mtu mara nyingi huonekana muhimu zaidi kuliko uhalisia wa maisha.
“Ukweli ni kwamba mitandao imeleta shinikizo kubwa la kijamii. Watu wanataka kuonekana wakamilifu, na hii inazalisha wasiwasi, madeni, na unyogovu,” alisema Dr. Dennis Ogolla, mtaalamu wa saikolojia ya kijamii kutoka Chuo Kikuu cha Nairobi.
Akothee, ambaye amekuwa akizungumza wazi kuhusu changamoto zake binafsi, amewahi pia kuwashauri mashabiki wake kuishi maisha ya kweli na kujikubali.
“Usiishi ili upate ‘likes’. Ishi kwa furaha yako. Watu wa mitandaoni hawalipi bili zako,” alisema katika moja ya video zake za awali.
© Radio Jambo 2024. All rights reserved