Kindiki Azidi Kuwinda Kura Za Ukambani

Naibu Rais Kithure Kindiki ameanza juhudi za kimkakati za kuimarisha uungwaji mkono wa kisiasa katika eneo la Ukambani.

Kindiki alikutana na zaidi ya Wajumbe 100 wa Bunge la Kaunti (MCAs) kutoka kaunti za Machakos, Makueni na Kitui siku ya Jumatatu.

Wakati wa mkutano huo, aliwataka kiongozi wa chama cha Wiper, Kalonzo Musyoka, kuachana na kile alichokitaja kama "siasa za kugawa na za kikabila" zinazopigiwa debe na upinzani, na badala yake ajiunge na serikali ya Kenya Kwanza.

Naibu Rais Prof. Kithure Kindiki alisisitiza tena dhamira yake ya kuhakikisha anaungwa mkono kisiasa katika eneo la Ukambani, kwa kukutana na Waakilishi Wadi 104 kutoka kaunti hizo tatu.

Katika mkutano huo, Kindiki alielezea masikitiko yake kuhusu Kalonzo akihusishwa na kile alichokiita siasa zisizo za kawaida kwake, akisema kuwa mbinu zinazotumiwa na upinzani kwa sasa si sehemu ya historia ya kisiasa ya Makamu huyo wa Rais wa zamani.

“Inasikitisha kumuona ndugu yangu Kalonzo akikumbatia nafasi ya siasa ambayo si yake na ambayo haimtambulishi. Kalonzo hajulikani kwa siasa za ukabila au za kugawa watu,” alisema Kindiki.

Mkutano huo na Waakilishi Wadi 104 ni sehemu ya mkakati mpana wa serikali ya Kenya Kwanza kuhakikisha inaungwa mkono Ukambani na kusukuma mbele ajenda yake ya maendeleo. Kindiki aliwataka viongozi wa eneo hilo kuunga mkono juhudi za serikali, akisisitiza kuwa siasa zisizo na maana zisivuruge utoaji wa huduma.

“Msikubali kuvurugwa na watu wa ovyo wanaotaka mjadili mambo yasiyo na maana kama nani mrefu au mfupi. Jihusisheni na masuala mazito yatakayoboresha maisha ya watu wenu, wakiwemo wa Ukambani,” alisema.

Kindiki alieleza miradi kadhaa ya maendeleo inayolenga eneo hilo, ikiwa ni pamoja na kuimarisha mnyororo wa thamani wa kilimo kwa mazao kama kahawa, chai, mahindi na miwa. Pia alitangaza mipango ya kuwahusisha wakulima wa jamii ya mikunde kupitia mpango wa kitaifa wa ruzuku ya mbolea.

“Hivi karibuni, nitawakutanisha wakulima wa mikunde hapa tujadili jinsi watakavyonufaika na programu na sera za serikali. Wakulima wetu wote ni muhimu,” aliongeza.

Jitihada hizi za Kindiki kuelekea Ukambani ni sehemu ya mikakati ya serikali ya kudhoofisha ushawishi wa upinzani katika eneo hilo kwa kuwavutia viongozi wa Wiper na kuwahakikishia miradi ya maendeleo.