Kiongozi wa chama cha Democracy for the Citizens Party (DCP) na Naibu Rais wa zamani Rigathi Gachagua amefichua kile anacholenga kufanikisha wakati wa ziara yake ya miezi miwili nchini Marekani.
Gachagua alisema kuwa atakuwa akilenga kuungana tena na Wakenya wanaoishi ughaibuni na kuwatia moyo watoe msaada wa maendeleo kwa maeneo yao ya nyumbani.
Alitoa tangazo hilo Jumapili, Juni 29, 2025, alipokuwa akihutubia katika Dayosisi ya ACK ya Nyahururu, Kaunti ya Laikipia.
Alieleza kuwa uamuzi wake wa kuzuru Marekani ulitokana na haja ya kuwatafuta Wakenya waliokwenda Marekani miaka mingi iliyopita, wakapata utajiri, lakini wakasalia mbali na mizizi yao.
“Na ndiyo sababu ninaenda Marekani kwa miezi miwili, kuwatafuta watu wetu waliopotea huko. Walienda huko miaka mingi iliyopita na wamepata utajiri mkubwa, lakini sisi hapa tunahangaika. Nimeenda kuwatafuta watu hao maeneo kama Texas na kuwahimiza warudi watusaidie na kutuunga mkono. Ili tupendane,” alisema.
Gachagua, ambaye alifichua kuwa ratiba yake itajumuisha majimbo kama Texas, aliwahimiza walioko ughaibuni wakumbuke walikotoka na waendelee kushikamana na nyumbani.
Alisema kuwa ujumbe wake pia unalenga watu kutoka eneo lake waliotengeneza maisha yao katika miji kama Nairobi, akiwataka wasisahau asili yao na waendelee kuelekeza msaada nyumbani.
“Rudini mkae na watu wenu wakiwa hai. Hamtakaa Nairobi milele. Ninafurahia watu wa diaspora, na huo ndio mwelekeo. Msisahau kuwa hakuna mtu asiye na mahali pa asili,” aliongeza.
Alizungumza pia kuhusu uzoefu wake binafsi wa kisiasa, akitaja mvutano wake na Rais William Ruto ambao aliuhusisha na watu wa eneo lake la Wamunyoro.
Alisema kwamba alikuwa mtetezi thabiti wa Wamunyoro, eneo lake la nyumbani, alipokuwa serikalini chini ya Ruto, na kwamba changamoto alizokumbana nazo — ikiwemo hatimaye kuondolewa madarakani — zilitokana na msimamo wake wa kusukuma maendeleo kuelekezwa huko.
“Nilipigwa na Ruto kwa sababu ya Wamunyoro, mahali ninapotoka. Sasa Wamunyoro imekuwa kama mlima. Kila mtu ana kwao. Kila mtu arudi kwao awasaidie watu wake wajenge nyumba nzuri. Usitembee na gari kubwa, halafu ukirudi nyumbani ni aibu,” alisema.
Vilevile, Gachagua alieleza kuwa ana imani kuwa bado anaungwa mkono na wananchi wa kawaida, akihusisha hilo na msimamo wake wa kusikiliza kilio cha wananchi na kuwapa nafasi ya kusikika kila wakati.
Pia alieleza kufurahishwa na baadhi ya Wakenya wa diaspora ambao wamekuwa wakielekeza rasilimali zao kusaidia ujenzi wa makanisa na kuinua familia zao nyumbani licha ya kuwa mbali.
“Mimi ni mtu ambaye husikiliza sauti ya wananchi, na naweza kusema mambo yako sawa. Nataka kuwashukuru watu wa diaspora kwa namna ya pekee. Nimejawa na unyenyekevu kwa sababu yenu na kwa watu wa Nairobi kwa kazi nzuri mliyoifanya kusaidia watu wenu hapa Nyandarua. Mungu awabariki, na kama Mungu atawabariki na vitu, mrudi mbabariki wazazi wenu navyo na pia mjenge makanisa hapa,” alisema.
© Radio Jambo 2024. All rights reserved