Jaji Chacha Mwita amekataa kutoa amri za muda za kumzuia Naibu Mkuu wa Polisi (DIG) Eliud Lagat kurejea kazini, huku kesi ya kisheria iliyoanzishwa na mwanaharakati Eliud Matindi ikiendelea kushughulikiwa.
Badala yake, Jaji huyo wa Mahakama Kuu alimwelekeza Lagat awasilishe majibu yake rasmi kuhusu kesi hiyo kabla ya Julai 23, ili kuruhusu mchakato wa kisheria kuendelea kwa mujibu wa taratibu.
Matindi aliwasilisha ombi mahakamani akiomba Lagat azuiwe kurejea ofisini, akitaja wasiwasi ambao bado haujafafanuliwa hadharani. Mwanaharakati huyo anapinga uhalali au uadilifu wa Lagat kuendelea kushikilia wadhifa huo, ingawa maelezo kamili ya madai bado yanazingatiwa na mahakama.
Katika uamuzi wake wa kukataa kutoa amri za dharura, Jaji Mwita alieleza kuwa pande zote lazima zisikilizwe kabla ya uamuzi wowote wa msingi kutolewa kuhusu suala hilo.
Hii inamaanisha kwamba Lagat atarejea kazini wakati wowote kuanzia sasa, baada ya kusafishwa dhidi ya tuhuma kuhusiana na kifo tata cha mwalimu na mwanablogu Albert Ojwang, aliyefariki akiwa chini ya ulinzi wa polisi mwezi uliopita.
Lagat alijiondoa kwa hiari kutoka afisini mnamo Juni 16, kufuatia shinikizo kubwa kutoka kwa umma, na kukabidhi majukumu yake kwa Naibu Mkuu wake Patrick Tito, wakati Mamlaka Huru ya Kusimamia Utendaji wa Polisi (IPOA) ilipoanzisha uchunguzi kuhusu tukio hilo.
Mkuu wa Polisi, Douglas Kanja, amethibitisha kuwa Lagat hakuwa na hatia na anatarajiwa kurejea kazini.
“Natarajia kumuona akirejea ofisini leo kwa sababu amesafishwa na uchunguzi wote,” Kanja aliambia gazeti la Nation siku ya Jumapili.
Kurejea kwa Lagat kunakuja baada ya zaidi ya wiki mbili za uchunguzi wa umma na hali ya sintofahamu ya kisheria kufuatia kifo cha Albert Ojwang, ambaye alikamatwa na maafisa wa Idara ya Upelelezi wa Jinai (DCI) na baadaye kufariki katika Kituo Kikuu cha Polisi cha Nairobi mnamo Juni 8, 2025.
Ripoti ya upasuaji wa maiti ilionyesha kuwa Ojwang alinyongwa na kupigwa.
Lagat alijiondoa kwa hiari baada ya kubainika kuwa ndiye aliyetoa malalamiko ya awali yaliyosababisha kukamatwa kwa Ojwang. Inadaiwa kwamba mwalimu huyo na mwanablogu alikuwa amemhusisha Lagat na madai ya ufisadi kupitia chapisho la mitandao ya kijamii. Baadaye, Lagat alitoa taarifa ya umma akieleza uamuzi wake wa kuondoka kwa muda ofisini.
“Kwa dhamira njema na kwa kutambua wajibu wangu kama Naibu Mkuu wa Huduma ya Polisi ya Kenya... nimeamua kujiondoa kwa muda hadi uchunguzi utakapokamilika. Niko tayari kushirikiana kwa hali yoyote inayohitajika wakati wa uchunguzi,” alisema.
Waziri wa Usalama wa Ndani, Kipchumba Murkomen, alipuuzilia mbali wito wa kumtaka Lagat ajiuzulu, akisema kuwa DIG ni afisa mwenye tajriba ambaye anaelewa vyema mchakato wa uchunguzi.
“DIG ni afisa mwenye uzoefu ambaye anaelewa mahitaji ya uchunguzi. Tuwape IPOA nafasi ya kufanya kazi yao,” alisema wakati huo.
Ripoti za uchunguzi wa IPOA zinaonyesha kuwa hakukuwa na ushahidi wa moja kwa moja unaomhusisha Lagat na shambulio lililosababisha kifo hicho.
Hata hivyo, watu sita, wakiwemo Mkuu wa Kituo cha Polisi cha Nairobi (OCS) Samson Talaam, maafisa wa polisi John Mukhwana na Peter Kimani, pamoja na raia John Ngige Gitau, Gin Ammitou Abwao, na Brian Mwaniki Njue, tayari wamefunguliwa mashtaka ya mauaji ya Ojwang.
