Kalonzo Alaani Ufisadi wa Tiketi CHAN, Aahidi Kufadhili Mashabiki 500

NAIROBI, KENYA | Agosti 3, 2025 — Kiongozi wa chama cha Wiper Kalonzo Musyoka amekemea kile alichokitaja kama ufisadi wa tiketi ulioathiri mechi ya ufunguzi ya Kenya dhidi ya Jamhuri ya Kidemokrasia ya Congo kwenye michuano ya CHAN 2025, na kuahidi kufadhili mashabiki 500 kuhudhuria mechi zijazo.

Tiketi zote za mechi kati ya Kenya na DRC zilidaiwa kuisha mapema, lakini bado viti vingi vilibaki wazi uwanjani, jambo lililozua hasira miongoni mwa mashabiki.

Kalonzo anaitaka serikali kuwapa mashabiki halisi nafasi ya kuiona Harambee Stars ikicheza nyumbani.

Kalonzo: Ufisadi wa Tiketi Wamewanyima Wakenya Burudani

Kiongozi wa chama cha Wiper Patriotic Front (WPF) Kalonzo Musyoka siku ya Jumapili alitoa taarifa kali baada ya mechi ya ufunguzi ya CHAN kati ya Kenya na DRC, akilaumu serikali kwa kile alichokitaja kama ununuzi wa tiketi kwa jumla uliowaacha mashabiki halisi nje ya uwanja wa Kasarani.

"Mpira wa miguu ni lugha ya dunia inayowaunganisha watu bila kujali asili, imani, au itikadi zao za kisiasa. Kwa hivyo, ununuzi wa tiketi kwa jumla unaofanywa na serikali hii na kuwanyima mashabiki wa kweli fursa ya kuwaona Harambee Stars unapaswa kulaaniwa," alisema Kalonzo.

Kalonzo Kufadhili Mashabiki 500 Kwa Mechi Zilizobaki

Ili kuhakikisha kuwa mashabiki wanahudhuria mechi zijazo za Harambee Stars katika uwanja wa Kasarani, Kalonzo alitangaza mpango wa kufadhili watu 500 kupitia Shirikisho la Mashabiki wa Soka Nchini (KEFOFA), ambapo yeye ni mlezi mkuu.

"Nitafadhili mashabiki 500 kuhudhuria mechi tatu zijazo za CHAN 2024 za Harambee Stars hapa Kasarani kupitia KEFOFA, ambao mimi ni mlezi wao. Mpira ni wa kila mtu," alisema Kalonzo.

Viti Vya Bure Wakati Tiketi Zimedaiwa Kuisha

Licha ya tiketi kutangazwa kuisha mnamo Julai 29, 2025 – siku tano kabla ya mechi – mamia ya viti vilibaki wazi wakati Kenya ikiilaza DRC 1-0 katika mechi hiyo ya Kundi A.

Mashabiki wengi waliokuwa na hamu ya kuingia uwanjani walikosa tiketi, huku wanasiasa wachache wakionekana wakiwasambazia wafuasi wao tiketi za bure. Watu wengine walinaswa nje ya uwanja wakiziuza tiketi hizo kwa bei ya juu.

"Hii ilikuwa mechi iliyodaiwa kuuzwa tiketi zote, lakini bado tuliona viti vingi wazi. Mashabiki wa kweli walizuiwa nje," alisema Mercy Achieng’, shabiki wa Harambee Stars ambaye hakufanikiwa kuingia uwanjani.

Austin Odhiambo Aweka Historia

Katika mechi hiyo, kiungo wa Gor Mahia, Austin Odhiambo, aliandika historia kwa kufunga bao la kwanza la Kenya kwenye michuano ya CHAN.

Bao hilo lilifungwa katika dakika ya mwisho ya kipindi cha kwanza baada ya kuwapita walinzi wa Congo na kufunga kwa ustadi mkubwa.

"Ni ndoto kutimia kufunga kwa ajili ya Kenya katika mechi kama hii. Tumejiandaa kwa mechi zinazokuja," alisema Odhiambo baada ya mechi.

Ratiba: Mechi Zilizobaki za Harambee Stars

Kenya itarejea uwanjani Kasarani kwa mechi tatu muhimu:

Kenya dhidi ya Angola – Alhamisi, Agosti 7

Kenya dhidi ya Morocco – Jumapili, Agosti 10

Kenya dhidi ya Zambia – Jumapili, Agosti 17