Kifo cha Jirongo: DCI Yakanusha Kuvurugwa kwa Eneo la Ajali

Idara ya Upelelezi wa Makosa ya Jinai (DCI) imesema uchunguzi wa awali umebaini kuwa ajali iliyosababisha kifo cha aliyekuwa waziri na mbunge wa zamani, Cyrus Jirongo, ilitokea usiku wa tarehe 13 Desemba 2025 katika eneo la Karai, kwenye barabara kuu ya Nakuru–Nairobi.

Idara hiyo pia imethibitisha kwamba eneo la tukio halikuingiliwa kama ilivyodaiwa mitandaoni. DCI pia imethibitisha kuwa dereva wa basi la Climax Company Ltd lililohusika katika ajali hiyo ameitwa tena kwa hatua zaidi za kisheria.

DCI Yakanusha Madai ya Kuvurugwa kwa Eneo la Ajali

Katika taarifa yake ya tarehe 16 Desemba 2025, DCI ilisema maafisa wake walifika eneo la ajali mara moja na kulilinda kwa kufuata taratibu zote za uchunguzi.

 Kauli hiyo inalenga kukanusha madai yaliyosambaa kwenye mitandao ya kijamii yakidai kuwa ushahidi uliondolewa au kubadilishwa kabla ya polisi kufika.

“Uchunguzi wa awali haujaonyesha dalili zozote za kuingiliwa kwa eneo la ajali,” ilisema DCI.

Dereva wa Basi Aitwa Tena Kituo cha Trafiki

DCI imemtambua dereva wa basi lililohusika katika ajali hiyo kama Tyrus Githinji Kamau. Polisi wanasema dereva huyo alikamatwa na kuhojiwa ili kusaidia uchunguzi kabla ya kuachiliwa kwa dhamana ya pesa taslimu.

Kwa sasa anatakiwa kuripoti katika Kituo cha Trafiki cha Naivasha tarehe 22 Desemba 2025 kwa hatua zaidi za kisheria.

Kwa mujibu wa DCI, Kamau anakabiliwa na tuhuma za kusababisha kifo kwa kuendesha gari kwa njia hatari, kosa linalochunguzwa chini ya sheria za trafiki nchini.

Maelezo ya Ajali na Magari Yaliyohusika

Ajali hiyo ilihusisha gari la marehemu Cyrus Jirongo lenye nambari ya usajili KCZ 350C na basi la abiria KCU 576A linalomilikiwa na kampuni ya Climax Company Ltd.

Polisi wanasema mgongano huo ulitokea saa 2:19 asubuhi na ulikuwa wa ana kwa ana.

Kutokana na nguvu ya ajali, gari la Jirongo lilisukumwa umbali wa takribani mita 25 kutoka eneo la awali la mgongano, huku basi likisimama umbali wa karibu mita 50.

Maafisa wanasema hali ya magari hayo inaonyesha ajali ilikuwa na athari kubwa.

CCTV Yaonesha Dakika za Mwisho Kabla ya Ajali

DCI imesema imepata na kuchambua kwa awali rekodi za CCTV kutoka kituo cha mafuta cha Eagol kilicho karibu na eneo la ajali.

Video hizo zinaonyesha Cyrus Jirongo akiingia katika kituo hicho akitokea upande wa Nairobi saa 2:18:40 asubuhi.

Dakika chache baadaye, alisimama karibu na njia ya kutoka kabla ya kugeuza gari kuelekea Nairobi.

Sekunde chache baadaye, saa 2:19:25 asubuhi, basi la abiria lililokuwa likitokea upande wa Nakuru liligonga gari lake.

Polisi wamesema marehemu hakuingia kituoni kwa lengo la kujaza mafuta. Uchambuzi wa kina wa video hizo unaendelea ili kubaini kasi na mienendo ya magari kabla ya ajali.

Mashahidi na Uchunguzi wa Kiforensiki

Kwa mujibu wa DCI, wachunguzi wamehoji mlinzi wa zamu ya usiku na mhudumu wa mafuta waliokuwapo katika kituo hicho wakati tukio lilipotokea. /

Wawili hao wametoa maelezo yao binafsi kuhusu walichokiona usiku huo.

Baada ya ajali, DCI ilituma timu ya pamoja ya wachunguzi wa mauaji na wataalamu wa sayansi ya uchunguzi kutoka Maabara ya Kitaifa ya Uchunguzi wa Kiforensiki.

Timu hiyo ilifanya uchunguzi wa eneo la ajali, ikakagua magari yaliyohusika na kuhifadhi vielelezo muhimu kwa uchunguzi zaidi.

Harakati za Mwisho za Jirongo Zachunguzwa

Polisi pia wanaendelea kuchunguza harakati za mwisho za Cyrus Jirongo kabla ya ajali. Hii ni pamoja na kurekodi kauli kutoka kwa watu aliokutana nao mapema usiku huo, wakiwemo waliokuwepo katika mkutano uliofanyika Karen Oasis Bar and Restaurant jijini Nairobi.

DCI imesisitiza kuwa hatua hii ni ya kawaida katika uchunguzi wa ajali yenye vifo na haimaanishi tuhuma zozote dhidi ya marehemu.

Hatua Zifuatazo

DCI imesema uchunguzi ukikamilika, faili kamili itawasilishwa kwa Mkurugenzi wa Mashtaka ya Umma kwa mapitio na ushauri wa kisheria.

Polisi wamewahimiza wananchi kuepuka uvumi na kusubiri taarifa rasmi huku wakiahidi kuendelea kutoa taarifa kadri uchunguzi unavyoendelea.